Хүнс, хөдөө аж ахуй, хөнгөн үйлдвэрийн сайд болон Байгаль орчин, уур амьсгалын өөрчлөлтийн сайдын эрхлэх асуудлын хүрээний 2027 оны төсвийн төслийн олон нийтийн нээлттэй хэлэлцүүлэг болжээ. Хэлэлцүүлэгт хоёр яамны удирдлага, газар, хэлтэс болон харьяа агентлагуудын дарга нар, хувийн хэвшил, иргэний нийгмийн байгууллага, иргэдийн төлөөлөл оролцсон байна.

    Монгол Улсын Төсвийн тухай хууль болон холбогдох хууль тогтоомжийн дагуу төсвийн төслийг боловсруулж, иргэд, олон нийтэд нээлттэй танилцуулан санал, хүсэлтийг нь авч төсөлд тусгах зорилгоор ийнхүү анхны хэлэлцүүлгийг хийжээ.

    ХХААХҮЯ-ны Санхүү, хөрөнгө оруулалтын газрын дарга Г.Болорсүх хүнс, хөдөө аж ахуй, хөнгөн үйлдвэрийн салбарын нийгэм, эдийн засгийн үзүүлэлт, 2027 оны төсвийн санал, хэрэгжиж буй төсөл, хөтөлбөрүүдийн үр дүнг танилцуулж, хэлэлцүүлсэн байна.

    Монгол Улсын Засгийн газрын 2024-2028 оны үйл ажиллагааны хөтөлбөрт туссан “Хүнсний хувьсгал”, “Шинэ хоршоо”, “Цагаан алт”, “Атар IV” зэрэг төсөл, хөтөлбөрүүдийн зардал Хүнс, хөдөө аж ахуй, хөнгөн үйлдвэрийн сайдын багцад тусаж, санхүүжиж явдаг. Салбарын 2027 оны төсвийн хязгаар 511.100.38 сая төгрөгөөр батлагдсан бөгөөд 525.243,4 сая төгрөгийн саналыг Сангийн яаманд хүргүүлээд байгаа юм. Түүнчлэн сүүний урамшуулал, хүнсний хангамж, аюулгүй байдал, хяналт, мал эмнэлгийн урьдчилсан сэргийлэх үйл ажиллагаа болон хөнгөн үйлдвэр, мал аж ахуй, газар тариаланг хөгжүүлэх хөтөлбөрүүдэд санхүүжилтийг нэмэгдүүлэх саналыг тусгажээ.

   Улсын төсвийн төслийг боловсруулахаас эхлээд бүх шатанд иргэд, олон нийтийн оролцоог хангаж, саналыг нь тусгах зорилгоор салбар салбарын төрийн болон төрийн бус байгууллага, иргэний нийгмийн байгууллагын уулзалт, хэлэлцүүлгийг зохион байгуулж байна. Иргэд, олон нийтээс гарсан саналыг жил бүрийн наймдугаар сарын 15-ныг хүртэл хүлээн авч нэгтгэдэг юм.