Улсын хэмжээнд он гарсаар долоодугаар сарын 30-ны өдрийн байдлаар усны ослын 92 тохиолдол бүртгэгдэж, төв болон орон нутгийн Онцгой байдлын байгууллагын алба хаагчид 149 иргэний амь насыг аварч хамгаалжээ.

   Үер, усны ослын эрсдэл өндөр бүсүүдэд хийсэн судалгаа, зураглалын хүрээнд 21 аймаг, нийслэлийн есөн дүүргийн хэмжээнд гол, мөрөн, нуурын орчмын нийт 399 эрсдэлтэй цэгийг тогтоож, анхааруулах тэмдэг, тэмдэглэгээ байршуулсан байна.

   Мөн иргэдийн аюулгүй байдлыг хангах зорилгоор усны ослын эрсдэл өндөр, хүн олноор зорчдог нийслэлийн таван дүүрэг, 13 аймгийн 40 байршилд хөдөлгөөнт болон завьт эргүүлүүд тогтмол үүрэг гүйцэтгэн ажиллаж байгаа аж.

   Иймд иргэд, малчид, аялагчид та бүхэн үер, усны ослоос урьдчилан сэргийлэх мэдээ, мэдээллийг тогтмол авч, мэргэжлийн байгууллагаас өгч буй заавар, зөвлөмжийг мөрдөн, хувийн аюулгүй байдлаа хангаж, сонор сэрэмжтэй байхыг Онцгой байдлын байгууллагаас зөвлөж байна.