Монголын театрын урлагийг дэлхийн тайзанд хүргэх шинэ үе эхэлж байна.

Дэлхийн театрын салбарын тэргүүлэгч Nederlander группийн ерөнхий захирал Боб Недерландер (Bob Nederlander) болон Broadway-ийн нэрт продюсер, ерөнхий менежер Дон Франц (Don Frantz) нар Үндэсний их баяр наадмын үеэр Монгол Улсад хүрэлцэн ирж, "Монгол Хаан" жүжгийг үзэн Broadway-д толилуулах төслийн хөгжүүлэлтийн дараагийн шатны ажлыг эхлүүлэхээр болжээ.

Мөн энэ удаагийн тоглолтыг үзэхээр Турк, Орос, Герман, Итали зэрэг улсын театрын продюсерууд, төлөөлөгчид Монголд хүрэлцэн ирнэ. Тэд "Монгол Хаан" жүжгийг өөрсдийн улс оронд толилуулах боломж, хамтын ажиллагааны хэлбэрийг судлах бөгөөд энэ нь бүтээлийг олон улсын шинэ зах зээлүүдэд хүргэх боломжийг улам тэлж байна.

120 гаруй жилийн түүхтэй Nederlander групп нь Broadway-ийн 41 театрын есийг эзэмшдэг бөгөөд АНУ болон олон улсын хэмжээнд 30 гаруй театрын үйл ажиллагааг удирддаг дэлхийн хамгийн нэр хүндтэй театрын байгууллагуудын нэг юм. Тус байгууллагын театрын сүлжээ, продюсерын хамтын ажиллагаагаар Hamilton, The Lion King, Wicked, Cats, The Color Purple, Hello, Dolly! зэрэг дэлхийд алдартай бүтээлүүд үзэгчдийн хүртээл болж ирсэн бөгөөд Broadway-ийн хөгжлийг тодорхойлогч гол байгууллагуудын нэгт тооцогддог.

2025 оны 12-р сард Нью-Йорк хотноо Hero Entertainment болон Nederlander групп хамтын ажиллагааны санамж бичиг байгуулснаар "Монгол Хаан" жүжгийг Broadway-д хүргэх албан ёсны хамтын ажиллагаа эхэлсэн юм. Санамж бичигт Hero Entertainment-ийг төлөөлөн төслийн продюсерууд Херо Баатар, М.Есөнмөнх, А.Амундра, А.Баярцэцэг, Nederlander группийг төлөөлөн ерөнхий захирал Боб Недерландер гарын үсэг зурсан. Энэхүү төслийн хүрээнд Боб Недерландер Америк дахь ерөнхий продюсераар, Дон Франц бүтээлийн ерөнхий менежерээр ажиллаж байна.

Дон Франц нь Disney Theatrical Productions-д олон жил ажиллаж, The Lion King, Beauty and the Beast зэрэг дэлхийн хамгийн амжилттай мюзиклүүдийн Broadway болон олон улсын аялан тоглолтын ерөнхий менежмент, хөгжүүлэлтийг хариуцан ажилласан театрын салбарын нэр хүндтэй мэргэжилтэн юм.

Ардын уран зохиолч Б.Лхагвасүрэнгийн "Тамгагүй төр" жүжгээс сэдэвлэн бүтээсэн "Монгол Хаан" жүжиг 2023 онд Лондон хотын London Coliseum театрт дэлхийн нээлтээ хийж, 17 удаагийн тоглолтоор 40 мянга гаруй үзэгч хүлээн авсан. Үүний дараа 2024 онд Сингапурын Marina Bay Sands театрт Азийн нээлтээ амжилттай зохион байгуулж, 2025 онд Япон улсад аялан тоглолтоо хийсэн. Харин энэ оны есдүгээр сард ОХУ-ын алдарт Марийнскийн театрын урилгаар Владивосток хотод тоглохоор бэлтгэлээ хангаад байна.

Broadway-ийн тэргүүлэх продюсерууд болон Европ, Азийн театрын салбарын төлөөлөгчид "Монгол Хаан" жүжгийг эх оронд нь үзэж, цаашдын хамтын ажиллагааны боломжийг хэлэлцэхээр хүрэлцэн ирж буй нь уг бүтээлийн олон улсын аяллыг шинэ шатанд гаргахын зэрэгцээ Монголын тайзны урлагийг дэлхийн үзэгчдэд хүргэх чухал үйл явдал болж байна.

- Тоглолтын хуваарь

2026.07.11— 14:00

2026.07.12— 14:00, 18:00

- Тасалбар авах холбоос: ticket.mn