Улаанбурхан өвчний батлагдсан тохиолдол улсын хэмжээнд 15535 хүрээд байгаа бөгөөд нийслэлд 12398, орон нутагт 3137 бүртгэгдсэн байна. Харин нас баралт 22 болжээ.

Халдварт өвчин судлалын үндэсний төвөөс гаргасан мэдээллээр, 2026 оны долоодугаар  сарын 7-ны байдлаар улаанбурхан өвчний батлагдсан тохиолдол 8 нэмэгджээ. Эмнэлэгт 28 хүн хэвтэн эмчлүүлж байгаа.  Тодруулбал, нийслэл Улаанбаатар хотод 15, орон нутагт 13 хэвтэн эмчлүүлж байна.  Харин гэрийн хяналтад 1 хүн байгаа аж.

Насны бүлгээр өвчлөл хамгийн өндөр байгаа нь 10-14 насны хүүхдүүд бөгөөд тэдний өвчлөл 5500 хүрсэн байна. Мөн 0-4 насны 3938, 5-9 насны 2028 хүүхэд, 15-19 насны 1873 хүүхэд улаанбурханаар өвджээ.

Улаанбурхан өвчин нь халдварлалт өндөртэй ч вакцинаар сэргийлэгдэх боломжтой халдварт өвчин юм. Улаанбурхан өвчний эсрэг вакцинд хамрагдсан тухай мэдээллээ өрх, сумын эрүүл мэндийн төвдөө очин цахим бүртгэлийн програмд бүртгүүлээрэй. Хэрвээ улаанбурханы эсрэг вакцинд хамрагдаагүй хоцорсон бол хамрагдан өөрийгөө болон бусдыг улаанбурхан өвчнөөс хамгаалаарай.

Эрүүл мэндийнхээ төлөө иргэн бүр хариуцлагатай байж, халдвараас сэргийлцгээе.