Үндэсний их баяр наадам ойртож буйтай холбоотойгоор “Наадмын тасалбар зарна” гэх хуурамч зар цахим орчинд нийтэлж, иргэдийг залилан мэхэлсэн зургаан хэрэг цагдаагийн байгууллагад бүртгэгдээд байна. Сүүлийн өдрүүдэд энэ төрлийн гэмт хэрэг нэмэгдэх хандлагатай байгааг албаныхан анхааруулжээ. Тухайлбал, нэгэн иргэн цахим орчинд байршуулсан “Наадмын тасалбар зарна” гэх зарын дагуу зургаан ширхэг тасалбар худалдан авахаар 2.2 сая төгрөг шилжүүлсэн ч тасалбараа авч чадаагүй бөгөөд залилангийн хохирогч болсон хэрэг бүртгэгдсэн байна. Иймд иргэдийг баталгаагүй цахим хаяг, танихгүй хувь хүнээс тасалбар худалдан авахгүй байх, урьдчилгаа төлбөр шилжүүлэхгүй байх, худалдагчийн мэдээллийг сайтар нягталж, зөвхөн албан ёсны эх сурвалжаас тасалбар худалдан авахыг цагдаагийн байгууллага зөвлөж байна. Мөн сэжигтэй зар мэдээлэлтэй таарсан, эсвэл залилангийн хохирогч болсон тохиолдолд холбогдох нотлох баримтаа хадгалж, цагдаагийн байгууллагад яаралтай хандахыг анхаарууллаа.