Эрдэнэт хотын 50 жилийн ойн хүрээнд иргэд, аж ахуйн нэгж байгууллагаас цугласан хандиваар хийж буй нэг ажил нь ерөнхий боловсролын сургуулиудад “Шүд угаах булан” тохижуулах юм.

Энэ хүрээнд аймгийн төрийн өмчийн 17, хувийн хэвшлийн 4 буюу нийт 21 сургуулийн 26 хичээлийн байрхүүхдийн нас, биеийн онцлогт тохирсон, 4-5 угаалтуур бүхий шүд угаах булантай болно. Ингэснээр сурагчид хичээлийн өдөр тутмын орчинд амны хөндийн эрүүл ахуйгаа сахих боломж бүрдэнэ. 

2025 онд ерөнхий боловсролын 22 сургуулийн 2,557 сурагчийг амны хөндийн эрүүл ахуйн үзлэгт хамруулахад 88.6 хувь нь шүдний өвчлөл, цооролттой, 81.5 хувь нь шүдээ зөв, бүрэн угаадаггүй гэсэн дүгнэлт гарчээ.

Тиймээс 50 жилийн ойн хүрээнд хэрэгжүүлж буй энэхүү санаачилга нь хүүхдийн амны хөндийн эрүүл мэндийг хамгаалах, шүдний өвчлөлөөс урьдчилан сэргийлэх, эрүүл ахуйн зөв дадлыг багаас нь төлөвшүүлэхэд чиглэсэн үр өгөөжтэй хөрөнгө оруулалт юм.