Монгол Улсын Их Хурлын дэд дарга Б.Пүрэвдорж 2026 оны 6 дугаар сарын 03-06-ны өдрүүдэд ОХУ-ын Санкт-Петербург хотноо зохион байгуулагдаж буй Петербургийн олон улсын эдийн засгийн XXIX чуулга уулзалтад оролцож байна.

Чуулга уулзалтын хүрээнд Улсын Их Хурлын дэд дарга Б.Пүрэвдорж чуулга уулзалтын нэгдсэн хуралдаан болон эрчим хүчний асуудлаарх салбар хуралдаанд оролцсон бөгөөд 6 дугаар сарын 04-ний өдөр болсон “Тогтворгүй цаг үеийн худалдаа” сэдэвт салбар хуралдаанд илтгэгчээр оролцож, үг хэлэв. Тэрбээр хэлсэн үгэндээ Монгол Улс болон Евразийн эдийн засгийн холбооны хооронд Худалдааны түр хэлэлцээрийг байгуулж, талууд 370 нэр төрлийн бараа, бүтээгдэхүүнийг татваргүйгээр харилцан экспортлох боломжтой болсныг онцлоод Монгол Улс шинэ автозам, төмөр зам, уламжлалт болон сэргээгдэх эрчим хүчний шинэ хүчин чадлууд болон логистикийн төвүүдийг байгуулах замаар дэд бүтцийн интеграц бий болгох зорилтыг тавин ажиллаж буйг тэмдэглэлээ. Энэхүү салбар хуралдаанд ОХУ-ын Засгийн газрын орлогч дарга А.Л.Оверчук, НҮБ-ын Худалдаа, хөгжлийн бага хурлын Ерөнхий нарийн бичгийн дарга Ребекка Гринспен, АПЕК-ийн Нарийн бичгийн дарга нарын газрын гүйцэтгэх захирал Эдуардо Педроса, Шанхайн стратеги, олон улсын судалгааны төвийн дэд дарга Нельсон Вонг зэрэг албаны хүмүүс илтгэгчээр оролцож, ЕАЭЗХ-ны гишүүн орнуудын эдийн засгийн гадаад бодлогын дэлхийн зах зээлийн хуваагдал, протекционизм, логистикийн маршрутын өөрчлөлтөд дасан зохицох арга замын талаар хэлэлцэж, санал солилцов. Түүнээс гадна, Улсын Их Хурлын дэд дарга Б.Пүрэвдорж Петербургийн олон улсын эдийн засгийн XXIX чуулга уулзалтад оролцох үеэрээ ОХУ-ын Засгийн газрын орлогч дарга А.Л.Оверчук, Эрчим хүчний сайд С.Е.Цивилев, Евразийн эдийн засгийн комиссын худалдааны асуудал эрхэлсэн сайд А.А.Слепнев, Ленинград мужийн захирагч А.Ю.Дрозденко, Санкт-Петербург хотын дарга А.Д.Беглов, Газпром НХН-ийн Удирдах Зөвлөлийн орлогч дарга В.А.Маркелов, Газпромбанкны ТУЗ-ийн орлогч дарга А.П.Белоус нартай тус тус уулзаж хамтын ажиллагааны холбогдох асуудлуудаар санал солилцов гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.