Монгол Улсын Их Хурлын дэд дарга Ж.Бат-Эрдэнэ өнөөдөр (2026.03.19) Унгар Улсын Үндэсний Ассамблейн дэд дарга Др.Олах Лайошийг хүлээн авч уулзлаа.

Уулзалтын эхэнд Улсын Их Хурлын дэд дарга Ж.Бат-Эрдэнэ, хүндэт зочидтой уулзаж байгаадаа баяртай байгаагаа илэрхийлээд Монгол Улсад тавтай зочлохыг хүсэв.

Манай улс гуравдагч хөрш, Европ дахь чухал түнш Унгар Улстай хөгжүүлж буй харилцаанд онцгой ач холбогдол өгч, хоёр талын харилцаа, хамтын ажиллагааг бүхий л салбарт өргөжүүлэн хөгжүүлэх нь манай улсын гадаад бодлогын тэргүүлэх зорилтуудын нэг болохыг тэмдэглэлээ. Монгол Улс “энхийг эрхэмлэсэн, нээлттэй, бие даасан, олон тулгуурт” гадаад бодлогыг тууштай хэрэгжүүлж байгааг дурдаад “Тиймээс дэлхийн бүх улс оронтой идэвхтэй харилцаж, харилцан итгэлцэл, үр дүнтэй хамтын ажиллагааг өрнүүлэхийг эрмэлзэж байна” хэмээсэн. Монгол, Унгарын харилцаа, хамтын ажиллагаа сүүлийн жилүүдэд хоёр талын хүч чармайлтын дүнд идэвхтэй өрнөж байгаад сэтгэл хангалуун байгаагаа Улсын Их Хурлын дэд дарга Ж.Бат-Эрдэнэ илэрхийлээд, тэр дундаа дээд, өндөр түвшний айлчлалын давтамж, харилцан ойлголцол сүүлийн жилүүдэд хоёр талд хэрэгжсэн айлчлалаар бэхэжсэнийг онцлон дурдав. Үргэлжлүүлэн тэрбээр Монгол Улс парламентын засаглалыг бэхжүүлж, тусгаар тогтнол, аюулгүй байдал, ардчилсан үнэт зүйлээ хадгалан хөгжих нь нэн чухал гэж үздэг болохыг тэмдэглээд 126 гишүүний бүрэлдэхүүнтэй анхны Улсын Их Хурлын талаар товч мэдээлэл танилцуулаад, 5 нам, эвслийн төлөөлөл бүхий энэхүү Улсын Их Хурал 32 эмэгтэй гишүүнтэй гэдгийг онцлов. Парламентын нийт гишүүдийн 25 хувь нь эмэгтэй гишүүд байгаа нь Ази тивийн дундаж үзүүлэлтээс давсан амжилт болохыг тодотгон хэлсэн. Унгар Улсын Үндэсний Ассамблейн дэд дарга Др.Олах Лайош, цаг зав гарган хүлээн авч уулзаж буйд Улсын Их Хурлын дэд дарга Ж.Бат-Эрдэнэд талархал илэрхийллээ. Хоёр улсын ард түмэн түүхээрээ, сэтгэл зүрхээрээ ойр дотно байдаг нь Унгар, Монголын харилцааны суурь болдог хэмээгээд, Монгол Улсын парламент дахь жендэрийн харьцаа нь чухал амжилт болохыг тэмдэглэн, сайшаав. Манай хоёр улсын харилцааны тэргүүлэх чиглэл нь боловсрол, соёлын салбар болохыг дурдаад Унгар Улсын Засгийн газрын тэтгэлэгээр жил бүр 200 монгол оюутан Унгарт суралцдаг нь бусад улс орныхоос хамгийн олон болохыг онцоллоо. Улсын Их Хурлын дэд дарга Ж.Бат-Эрдэнэ, Унгар Улсад мэдлэг, боловсрол эзэмшиж буй монгол залуус эх орныхоо бүтээн байгуулалтад үнэтэй хувь нэмэр оруулахын зэрэгцээ хоёр улсын ард түмэн хоорондын харилцааг бэхжүүлэхэд онцгой хувь нэмэр оруулна гэдэгт итгэлтэй байна гээд иймд боловсрол, соёлын салбарын хамтын ажиллагаа илүү өргөжүүлэн хөгжүүлнэ гэдэгт найдаж буйгаа илэрхийлсэн.  Хоёр улсын хамтын ажиллагааг эрчимжүүлэн хөгжүүлэхэд парламент болон парламентын бүлэг хоорондын харилцаа чухал үүрэг гүйцэтгэдэг болохыг талууд тэмдэглээд, дээд, өндөр түвшний айлчлалуудын үеэрх яриа, хэлэлцээ нь бодит ажил хэрэг болоход Засгийн газар хоорондын комисс чухал үүрэг, оролцоотой хэмээн санал нэгдэв.