• Өнөөдөр 2026-10-12

Мансууруулах бодистой холбоотой хэрэгт дөрвөн эмэгтэй ял шийтгүүлжээ

2026-06-04,   581

          Энэхүү мэдээлэл нь иргэдийг мансууруулах эм, сэтгэцэд нөлөөт бодистой холбоотой гэмт хэргээс урьдчилан сэргийлэх, иргэдэд гэмт хэргийн талаарх ойлголт, хэргийн шийдвэрлэлтийг ойлгомжтой байдлаар мэдээлэх зорилготой.
 
        Прокурорын байгууллагаас 2026 оны тавдугаар сарын сарын байдлаар Эрүүгийн хуулийн 20.7 дугаар зүйлд заасан Мансууруулах эм, сэтгэцэд нөлөөт бодисыг хууль бусаар ашиглахтай холбоотой 149 хүнд холбогдох 104 хэрэгт яллах дүгнэлт үйлдэж, шүүхэд шилжүүлсэн байна.
 
Нийслэлийн прокурорын газраас өнгөрсөн долоо хоногт буюу 2026 оны тавдугаар сарын 25-наас 29-ний өдрүүдэд дөрвөн хүнд холбогдох хоёр хэргийг анхан шатны шүүхээр шийдвэрлүүлж, шүүхээс 3 хүнд 2 жил, 6 сараас 8 жил, 6 сарын хугацаатай хорих ял, 1 хүнд зорчих эрхийг хязгаарлах ял оногдуулсан байна. Ял шийтгүүлсэн 4 хүн нь 26-28 насны эмэгтэйчүүд байна.
 
Шүүхээр шийдвэрлүүлсэн хэргийг тоймлон хүргэж байна.
 
- Л.Д (26 настай, эмэгтэй), Х.Н (28 настай, эмэгтэй) нар нь Бүгд Найрамдах Турк Улсад амьдарч буй нэр бүхий иргэнтэй бүлэглэн, НҮБ-ын 1971 оны “Сэтгэцэд нөлөөлөх бодисын тухай конвенц”-ийн II жагсаалтад багтсан метамфетамины агууламжтай, “мөс” гэх нэршилтэй, нийт 239,4 грамм жинтэй сэтгэцэд нөлөөт бодисыг худалдаалах зорилгоор бусдын ачаанд дайж, 2023 оны 7 дугаар сарын 03-ны өдөр “Чингис хаан” олон улсын агаарын замын боомтоор Монгол Улсын хилээр нэвтрүүлж, олж авч, хадгалсан, 
 
Мөн Л.Д нь дээрх гэмт хэрэгтээ шалгагдаж байх хугацаандаа Б.Х (26 настай, эмэгтэй)-тэй бүлэглэн 2024 оны арваннэгдүгээр сарын 21-ний өдөр Баянгол дүүргийн 9 дүгээр хорооны нутаг дэвсгэрт байрлах Э нэртэй зочид буудлын өрөөнд “мөс” гэх нэршилтэй сэтгэцэд нөлөөт бодисыг өөртөө хэрэглэх зорилгоор хадгалсан хэрэгт Эрүүгийн хуулийн 20.7 дугаар зүйлийн 1 дэх хэсэг, 3 дахь хэсгийн 3.3-т зааснаар яллах дүгнэлт үйлдэж, хэргийг шүүхэд шилжүүлсэн.
 
Шүүхээс Л.Д, Х.Н нарыг хориглосон сэтгэцэд нөлөөт бодисыг худалдаалах зорилгоор улсын хилээр нэвтрүүлсэн гэмт хэрэг үйлдсэн гэм буруутайд тус тус тооцож, Х.Н-д 5 жил, 6 сарын хугацаагаар хорих ял,
 
Л.Д, Б.Х нарыг хориглосон сэтгэцэд нөлөөт бодисыг худалдаалах зорилгогүйгээр олж авсан, хадгалсан гэмт хэрэг үйлдсэн гэм буруутайд тус тус тооцож, Б.Х-д 1 жилийн хугацаагаар зорчих эрх хязгаарлах ял,
 
Л.Д-г хоёр гэмт хэрэг үйлдсэн гэм буруутайд тооцсон тул нийт 8 жил, 6 сарын хугацаагаар хорих ял оногдуулж шийдвэрлэсэн. 
 
- Ц.А (27 настай, эмэгтэй) нь 2025 оны тавдугаар сарын 24-ний өдөр НҮБ-ын 1971 оны "Сэтгэцэд нөлөөлөх бодисын тухай" конвенцын II жагсаалтад багтсан, метамфетамины агууламжтай,  "мөс" гэх нэршилтэй хориглосон сэтгэцэд нөлөөт бодисыг хууль бусаар олж авсан, мөн оны 5 дугаар сарын 27-ны өдөр Баянгол дүүргийн 24 дүгээр хорооны нутаг дэвсгэрт байрлах гэртээ хадгалсан хэрэгт Эрүүгийн хуулийн 20.7 дугаар зүйлийн 1 дэх хэсэгт зааснаар яллах дүгнэлт үйлдэж, хэргийг шүүхэд шилжүүлсэн.
 
Шүүхээс Ц.А-г хориглосон сэтгэцэд нөлөөт бодисыг худалдаалах зорилгогүйгээр хууль бусаар олж авсан, хадгалсан гэмт хэрэг үйлдсэн гэм буруутайд тооцож, хоёр жил, зургаан сарын хугацаагаар хорих ял оногдуулж шийдвэрлэсэн.

Мансууруулах бодистой холбоотой хэрэгт дөрвөн эмэгтэй ял шийтгүүлжээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.