Баян-Өлгий аймгийн Толбо сумын нутагт автомашин онхолдож хүн нас барсан гэх мэдээлэл өчигдөр 19:00 цагийн үед тус аймгийн цагдаагийн газарт бүртгэгджээ. Мэдээллийн дагуу шалгахад зам тээврийн ослын улмаас 17 настай эмэгтэй А нас барж, 18 настай эмэгтэй Ж, Г, 19 настай эмэгтэй К нар гэмтэл авч, эмнэлэгийн хяналтад эмчлүүлж байна. Тухайн иргэд нь аймгийн Ерөнхий боловсролын сургуулийн 12 дугаар сурагчид байжээ. Хэргийн талаар Өлгий сумын Засаг даргаас тодруулахад “Манай сумын хүүхдүүд Толбо сумын нутаг дэвсгэрт автомашинтай зорчиж яваад осолдож, нэг нь амиа алдсан харамсалтай хэрэг гарсан. Гэмтэл авсан хүүхдүүдийг үзэхээр Улаанбаатар хотоос эмч нар ирж байгаа. Мөрдөн шалгах ажиллагаа үргэлжилж байгаа учир үүнээс өөр мэдээлэл өгөх боломжгүй байна” гэлээ.