"Оюутан цэрэг"-т цэргийн мэргэжил олгох сургалт явуулах талаар холбогдох албаныхан мэдээлэл өглөө. 

        Энэ үеэр Ардын багш, бэлтгэл хурандаа Г.Мягмаржав "Оюутан цэрэг" сургалт 11 дэх жилдээ хэрэгжиж байна. Нийт 10 мянга гаруй залуус оюутан цэрэгт хамрагдаад, цэргийн алба хааснаар тооцогдоод явж байгаа. Энэ жилийн тухайд Батлан хамгаалах сайдын тушаалын дагуу хот, хөдөөгийн 2000 орчим залуус оюутан цэрэгт хамрагдахаар байгаа. Оюутан цэрэгт явсан залуус алба хаах хугацаандаа 11 мэргэжлээс сонгон эзэмших юм. Энэ жилийн тухайд 13 мэргэжил болж шинэчлэгдэж байгаа. Оюутан цэргийн хөтөлбөр нь оюутан, залуусыг сургалт, хичээлээс нь хөндийрүүлэхгүйгээр цэргийн алба хаалгах боломж олгож байгаагаараа онцлог. Дөрөвдүгээр сарын 1-нээс зургадугаар сарын 1-н хүртэл онолын бэлтгэл сургуулилалт болно. Энэ хүрээнд дөрвөн төрлийн хичээл үзээд, хичээл болгондоо ерөнхий шалгалт өгөөд 60-аас дээш оноо авбал цэргийн мэргэжлийн бэлтгэлд зургадугаар сарын 15-наас наймдугаар сарын 15-н хүртэл оюутан цэргийн сургалтад хамрагдана. Ингэхдээ өөрийнхөө сурч байсан мэргэжилдээ тулгуурлаад цэргийн бага боловсрол эзэмших боломжтой. Хамгийн гол анхаарах зүйл бол магадлан итгэмжлэгдсэн сургуулийн I, II, III курсийн оюутнууд тухайн улирлынхаа 2.8 дээш голчтой оюутнуудыг Е-Mongolia системээр бүртгэж авна" гэв.