Сэтгүүлч Д.Сайнбаяр Монгол Улсын Соёлын гавьяат зүтгэлтэн цол хүртлээ. Тэрбээр энэ үеэр "Би сэтгүүл зүйн салбарт 44 ажиллаж байна. 1982 онд МУИС-ийг төгсөөд, Завхан аймгийн "Туяа" сониноос мэргэжлийн гараагаа эхэлсэн. Энэ хугацаанд сэтгүүл зүйн салбар маань өөрийн жамаар сайхан хөгжиж ирсэн. Манай сэтгүүл зүйн салбар бол өөрөө өөрийгөө ямар ч үе аваад явдгаараа мундаг байдаг. Сүүлийн жилүүдэд манай салбар шинэчлэгдэж, залуу сэтгүүлчид чадварлаг, мундаг ажиллаж байгаад баярлаж, талархаж байгаа. Тэр тусмаа салбар маань цэвэр, тунгалаг болох гараагаа эхэлж байна. Тэгээд бүр сэтгүүл зүйн бүтээлээ гадаад оронд хүртэл гаргаж байна. Энэ бүхэнд баярлаж, өнөөдөр ийм цаг үед энэ сайхан шагналын эзэн болсондоо талархаж байна. Миний нэрээр Соёлын гавьяат зүтгэлтэн гэх энэ шагналыг хүртээж байгаа ч цаад мөн чанартаа Монголын сэтгүүл зүйг үнэлсэн үнэлэмж гэж харж байна. Сэтгүүлчдийн маань ухаан улам тэлж, мэлмий нь тунгалаг байх болтугай гэж ерөөж байна. Бүгдээрээ сайхан шинэлээрэй. Монголчууд угаас хийморьтой. Ирэх жилдээ улам хийморь өөдөө байна гэдэгт итгэж байна" гэж баярын сэтгэгдлээ хуваалцсан юм.