Засгийн газрын ээлжит хуралдаанаас гарсан шийдвэрүүдийг танилцуулж байна. Энэ үеэр Хууль зүй, дотоод хэргийн сайд Б.Энхбаяр мэдээлэл өглөө.

Тэрбээр “Засгийн газрын өнөөдрийн хуралдаанаас хилийн бүсэд газар олгосон, хилийн бүсэд ашигт малтмал, уул уурхай үйл ажиллагаа явуулж байгаа болон хилийн бүсийн нүүрс тээвэрлэлтийн үйл ажиллагаатай холбоотой зарим компанид хууль бусаар давуу байдал олгож, их хэмжээний ашиг орлого хийсэнтэй холбоотой шийдвэрүүдийг гаргасан.

Улсын хилийн зурвас газарт хууль зөрчиж газар олгосон асуудлын талаар хэлэлцсэн. Улсын хилийн 900м-ээс 2,5 км-ийн нутаг дэвсгэр дээр  34227.8 га талбайг нийт улсын хилийн боомт дээр олгосон байна. Хилийн тухай хуульд зааснаар улсын хилийн газар нутагтай хиллэж байгаа хилийн зурвас боомт нь төрийн өмч, хилийн шугамаас дотогш 15км-ээс илүүгүйгээр тусгай журам тогтоосон нутаг дэвсгэрийг улсын хилийн зурвас гэнэ. Улсын хилийн зурваст хил хамгаалах зориулалтаас бусад барилга байгууламж барих үйл ажиллагаа явуулах, газар ашиглуулах асуудлыг Засгийн газар шийдвэрлэнэ. Улсын хилийн зурваст газрыг өмчлүүлэх, эзэмшүүлэхийг хориглох заалттай байдаг. Боомтын сэргэлтийн үндэсний хороо гэх бүтэж өнгөрсөн Засгийн газрын үед ажиллаж байсан. 2025 нэгдүгээр сарын 27-нд Боомтын сэргэлтийн хороо тогтоол гаргасан. Энэ тогтоолын хоёрдох заалтад Боомтын хөгжлийн корпораци, төрийн өмчийн ХХК байгуулах асуудлыг засгийн газрын хуралд танилцуулж батлуулахыг Боомтын сэргэлтийн үндэсний хорооны дарга, сайд Б.Тулгад, Б.Тулга өөрөө өөртөө даалгасан ийм тогтоол гаргасан. Дараагийн тогтоол нь мөн өөртөө даалгасан тогтоол байсан. 2025 оны хоёрдугаар сарын 5-ны өдөр тогтоолд дурдагдсан компанийг байгуулсан. Улмаар 2025 оны тавдугаар сарын 28-ны өдөр буюу Л.Оюун-Эрдэнийн Засгийн газар хамгийн сүүлийн хуралдаанаар огцрохоосоо дөрөв хоногийн өмнө  Боомтын сэргэлтийн хөгжлийн корпораци нэр дээр Монгол Улсын хилийн бүсэд 10 байршилд 34 мянган га газрыг ашиглуулах зөвшөөрөл гаргасан. Засгийн газрын 2025 оны тавдугаар сарын 28-ний өдрийн хуралдаанаар дээрх асуудлыг яаж хэлэлцэв гэж шүүж үзэхэд ямар ч хэлэлцүүлэг, асуулт хариулт явуулаагүй шууд алх цохиж шийдвэр гаргасан. Энэ боомтуудыг сэргээх хөгжүүлэхтэй холбоотой 10 хилийн бүсэд тэдгээрийг хөгжүүлэх ерөнхий төлөвлөлт хийгдээгүй, УИХ, Засгийн газраар батлуулсан төлөвлөлт байгаагүй. Булган хилийн боомт, Бичигт боомт, Бургастай, Хавирга, Арц суурь, Шивээхүрэн боомтод газар олгосон. Боомтыг хөгжүүлэх гэсэн халхавчаар газар олгосон байна гэж үзэж байгаа. Тийм учраас нэгдүгээрт, Үндсэн хууль, Үндэсний аюулгүй байдлын үзэл баримтлал, Монгол Улсын хилийн тухай хууль, холбогдох хууль тогтоомж зөрчиж, энэ шийдвэрийг гаргасан байна гэж үзэж, саяны газар олгосон шийдвэрийг хүчингүй болголоо. Хууль зүй дотоод хэргийн сайдад хууль хяналтын байгууллагын өргөн бүрэлдэхүүнтэйгээр олгосон зөвшөөрөл бүрийг шалгаж, шаардлагатай тохиолдолд хуулийн байгууллагад шилжүүлэхийг Ерөнхий сайд өнөөдөр үүрэг болгосон. Жишээ татан авч үзвэл хамгийн ойр нь 30 метр, 30 алхаад улсын хил гарна. Ингэж Монгол Улсын нутаг дэвсгэрийн бүрэн бүтэн байдал, үндэсний аюулгүй байдалд хор хохирол учруулахуйц шийдвэр гаргасан байна. Улсынхаа хилийг зарж идсэн байна гэдэг дүгнэлт хийж байгаа” гэв.