Өнөөдөр /2025.02.25/ “Төрийн байгууллагад эрсдэлийн удирдлагыг хэрэгжүүлэх нь” сэдэвт хэлэлцүүлэг Засгийн газрын Хяналт хэрэгжүүлэх газраас зохион байгууллаа.       
Хэлэлцүүлгийг нээж УИХ-ын гишүүн, Монгол Улсын сайд, Хяналт үнэлгээний Үндэсний хорооны дарга Э.Одбаяр 2024 оны УИХ-ын сонгуулийн үр дүнд байгуулагдсан хамтарсан Засгийн газрын бодлого, үйл ажиллагааны хөтөлбөрийг танилцуулав. 
Тэрээр, Монгол Улсын Засгийн газар үйл ажиллагааны хөтөлбөртөө бүсчилсэн хөгжлийн бодлого, хүний хөгжлийн бодлого, эдийн засгийн бодлого, хүний эрхийг дээдэлсэн засаглалын бодлого гэсэн үндсэн дөрвөн бодлогын хүрээнд 16 чиглэлийн 620 зорилтыг тусган хэрэгжүүлж байгааг онцлон тэмдэглэв. Эрсдэлийн удирдлагын тогтолцоог нэвтрүүлэн ажиллаж буй сайн туршлага бүхий төр, хувийн хэвшил болон олон улсын байгууллагуудын төлөөлөл үдээс өмнө “Төрийн байгууллагад эрсдэлийн удирдлагыг нэвтрүүлэхийн ач холбогдол”, “Төрийн байгууллагын эрсдэлийн удирдлагын тогтолцоо” зэрэг 7 сэдвийн хүрээнд илтгэл тавьж, хэлэлцүүлэг өрнүүлсэн. 

Харин үдээс хойш болсон “Эрсдэлийн удирдлагыг төрийн байгууллагуудад хэрэгжүүлэх арга зам” панел хэлэлцүүлгийн модератороор, СЭЗИС-ийн сургалт, судалгаа хариуцсан проректор, доктор  Б.Мөнхзаяа, Панелистаар, Монголын Ипотекийн Корпораци ОССК ХХК-ийн Эрсдэл хариуцсан, дэд захирал Д.Отгонбилэг, Үндэсний Статистикийн Хорооны Дотоод аудит, эрсдэлийн удирдлагын газрын дарга Н.Мөнхбаяр,  Хууль зүй, дотоод хэргийн яамны Хяналт-шинжилгээ, үнэлгээ, дотоод аудитын газрын даргын албан үүргийг түр орлон гүйцэтгэгч Т.Төмөр-Очир, Онцгой байдлын ерөнхий газрын Тэргүүн дэд дарга бөгөөд Штабын дарга, хурандаа, доктор (Ph.D) Ц.Ганзориг, Гаалийн ерөнхий газрын Эрсдэлийн удирдлагын хэлтсийн дарга, Дэлхийн гаалийн байгууллагын Эрсдэлийн удирдлагын үйл ажиллагааны болон техникийн зөвлөх, доктор, дэд профессор (Ph.D) Д.Цэндсүрэн, Нэгдсэн Үндэстний Байгууллагын Хөгжлийн Хөтөлбөрийн Судалгаа, хөгжүүлэлт хариуцсан ахлах мэргэжилтэн Э.Тэлмэн нар оролцож төр болон хувийн хэвшлийн сайн туршлага, дотоод, гадаадын сайн туршлагуудын жишиг, манай улсад эрсдэлийн удирдлагын олон улсын стандарт, тогтолцоог хэрхэн нэвтрүүлсэн, цаашид хэрхэн төлөвшүүлэх, тулгардаг асуудал, бэрхшээл, цаашдын чиг хандлагын талаар нээлттэй санал солилцлоо.