Төрийн байгуулалтын байнгын хорооны хуралдаанаар Ерөнхий сайдад Итгэл үзүүлэх тогтоолын төслийг хэлэлцүүлж байна. Хэлэлцэж байгаа асуудалтай холбоотойгоор гишүүд асуулт асууж хариулт авч байна.

Энэ  үеэр УИХ-ын гишүүн Н.Номтойбаяр “Ерөнхий сайд, ер нь хэн ч бай Үндсэн хуулийн 44.1-т заасан итгэл үзүүлэх эсэх асуудлыг оруулж ирж байгаа нь цаашид шинэ жишиг болж, шинэ сахилга бат, ёс зүй болно гэж найдаж байна. Мартагдсан зүйл заалтыг амь оруулж байгаа Ерөнхий сайд Л.Оюун-Эрдэнэд талархаж байна. Итгэл үзүүлэх тухай албан бичигтээ хууль зүй болон бусад нөхцөл байдлын хувьд тун анхааралтай, үг үсэггүй уншиж, шалгалаа. Мэдээж энэ албан бичгийг  боловсруулахдаа үгийн сонголт, утга найруулга, улс төрийн мессеж гээд бүх зүйлийг олон талаас нь үзсэн байх. Энэ албан бичиг дээр “Үүссэн улс төрийн нөхцөл байдлаас шалтгаалан цаашид сонгодог парламентын тогтолцоог төгөлдөршүүлэх дэмжлэг шаардлагатай байна” гэсэн байна. Энэ үг, өгүүлбэрийн цаад учир шалтгаан нь юу юм бэ, яагаад ингэж бичих болов. Ямар улс төрийн нөхцөл байдал үүсэв, шалтгаан нь юу юм. Яагаад сонгодог парламентын тогтолцоог төгөлдөршүүлэх шаардлагатай гэж та үзэв. Мөн хэвлэл мэдээллийн байгууллагууд Ерөнхий сайдад “Бидэнтэй ил тод нээлттэй уулзаад өгөөч” гэж уламжлаад өгөөч гэснийг танд уламжилъя.

Түүний асуултад Ерөнхий сайд Л.Оюун-Эрдэнэ “Ямар ч үр дүн гарснаас үл хамааран хурлын дараа нээлттэй хэвлэлийн бага хурал хийх боломжтой. Яагаад парламентын эхэлж ярих ёстой гэж үзсэн бэ гэхээр Парламентын процесс буюу ард түмний төлөөллийн төв байгууллагын асуултад эхэлж хариулах нь зүй ёсны асуудал. Тэрний өмнө тайлбар хийж, ямар нэгэн нөлдөө үзүүлэх гээд өөрийгөө зөвтгөх, асуудлыг нэг талд нь гарч тайлбарлах гээд байх сонирхол надад байгаагүй гэдгийг хэвлэл мэдээллийнхэндээ хэлье. Миний хувьд хэвлэлийнхэнтэйгээ нээлттэй уулздаг. Яг тэр жишгээр уулзаж, сонирхсон асуултдаа хариулт аваарай. Сонгодог парламентын засаглал гэдгийг бид бүгд мэдэж байгаа. Монгол Улс парламентын засаглалтай. Парламент бие даан шийдвэр гаргадаг байх эрхийг баталгаажуулж байгаа. 16-126 болсноороо бид Монгол Улсын ард түмнийг төлөөлж байгаа. Ард түмнийг төлөөлж байгаа элчийн хувьд энэ шийдвэрээ гаргах нь зүйтэй байна. Энэ агуулгын хүрээнд сонгодог парламентад байдаг нийтлэг жишгийг хэвшүүлэх гэж энэ асуудлыг оруулж ирж байгаа юм” гэв.