2025 оны зургадугаар сарын 2-нд Монгол Улсын Ерөнхийлөгч Ухнаагийн Хүрэлсүхийн урилгаар Туркменистан Улсын Ерөнхийлөгч Сердар Бердымухамедов албан ёсны төрийн айлчлал хийж байна. Айлчлалын хүрээнд хоёр улсын Ерөнхийлөгчид Засгийн газрын гишүүдтэйгээ хамтран 30 гаруй жилийн хамтын ажиллагааны амжилт, ололтыг дүгнэн ярилцаж, эдийн засгийн шинэ боломжуудыг эрэлхийлсэн юм. Түүнчлэн, хөнгөн үйлдвэрийн салбарт харилцан ашигтай хамтын ажиллагааг хөгжүүлэхээр “Хөнгөн үйлдвэрлэлийн салбарт хамтран ажиллах тухай” харилцан ойлголцлын санамж бичигт гарын үсэг зурлаа. Санамж бичигт Монгол Улсын Хүнс, хөдөө аж ахуй, хөнгөн үйлдвэрийн сайд Ж.Энхбаяр, Туркменистаны Хөнгөн үйлдвэрийн сайд Н.Оразгелдиев нар гарын үсэг зурж, нэхмэл, оёдлын үйлдвэрлэлийн чиглэлд хамтран ажиллах төсөл, хөтөлбөрийг хэрэгжүүлэхээр тохиролцлоо. Энэхүү хамтын ажиллагаа нь Монгол, Туркменистаны эдийн засгийн харилцааг өргөжүүлж, хөнгөн үйлдвэрийн салбарт үйлдвэрлэл, технологийн чадавхийг нэмэгдүүлэх, шинэ ажлын байр бий болгох чухал алхам болохыг талууд онцоллоо.