“Монголын хүүхдүүд 2025” нэгдсэн арга хэмжээний хүрээнд Монголын хүүхдийн ордны захирал Б.Цэнгэлмаатай ярилцлаа.  Танд энэ өдрийн мэнд хүргэе. Энэ жилийн Олон улсын хүүхдийн эрхийг хамгаалах өдрийн онцлог сюрперизийн эзэн “Хун шувуу”-ны тухай яриа өгнө үү?

       Манай байгууллага урлаг, уран бүтээл, шинжлэх ухаан, спортыг сургалтаар дамжуулан хүүхэд багачуудыг  оюун ухаан, бие махбодын хөгжлийн хэрэгцээг хангах, хүүхдийн төлөвшил хүмүүжилд эергээр нөлөөлөх чиг үүргийг хэрэгжүүлдэг төрийн байгууллага юм. Энэ жил манай зураг, гар урлал болоод тайзны зураачаас бүрдсэн хамт олон хүүхдийн гэгээлэг, хайр дүүрэн ертөнцийг бэлгэдэн 4.8 метр өндөр 8 метр урттай сүрлэг “Хун шувуу”-г урлаж өмнө нь байгаагүй баярын парадыг хүүхэд багачуудадаа толилууллаа.

Арга хэмжээ маань 400 гаруй хүний бүрэлдэхүүнтэй парад алхаагаар эхлэн бүжгийн дугуйлангийн 300 орчим хүүхэд флаш моб бүжиглэн оролцлоо.

Жил бүрийн энэ өдөр Монголын хүүхдийн ордон ямар уран бүтээл, арга хэмжээг хүүхэд багачууддаа зориулан хүргэдэг вэ?

         Бид 2022 оноос эхлэн жил бүр НЗДТГ-тай хамтран Шангрилла Моллоос Баянгол зочид буудал хүртэлх авто замыг хааж “Хүүхдийн ертөнц-Street festival” баярын гудамжийг хүүхэд багачууддаа зориулан чимэглэн, хөтөлбөр, үйл ажиллагаа, төрөл бүрийн үйлчилгээг хүргэж ирсэн. Мөн бүтэн өдрийн дугуйлангийн сурачгдын тоглолтыг хүргэж урлаг соёлын үйлчилгээг хүргэдэг. Энэ бүх ажлын ард “Бүхнийг хүүхдийн сайн сайхны төлөө” зорилгын дор манай хамт олон, багш сурагчид, хамтран ажиллагсад  нийтдээ маш олон хүн ажиллаж 18,000 гаруй хүүхдийг баярлуулдаг, адал явдал, аз жаргалаар дүүрэн өнгөрүүлдэг томоохон соёлын арга хэмжээ болж өнгөрдөг.

Баярлалаа. Та бүхний зохион байгуулсан арга хэмжээ маш гайхалтай сайхан болж өндөрлөлөө. Хүүхдийн баярын энэхүү сайхан өдөр Та хүүхэд багачууддаа хандаж үг хэлнэ үү.

    Үндэстний ирээдүй, эх орны үнэт баялаг, эрхмийн дээд эрдэнэ болсон бүх хүүхэд багачууддаа эрүүл саруул, баяр жаргал дүүрэн өсөж, эрдэм номдоо шамдан суралцаж, эцэг эхдээ ачлалтай, эх орондоо тустай иргэн болон төлөвшихийн ерөөл өргөе. Мөн Монголын хүүхдийн ордонд суралцахыг хүссэн хүүхэд бүрд манай үүд хаалга үргэлж нээлттэй тул наран гийсэн багачуудын ордондоо ирж авьяас чадвараа хөгжүүлээрэй хүүхдүүд ээ.