Алдарт загвар өмсөгч Хейли Бибер өөрийн үүсгэн байгуулсан гоо сайхны “Rhode” брэндээ Америкийн гоо сайхны бүтээгдэхүүний гигант болох e.l.f. Beauty компанид 1 тэрбум ам.долларын үнэлгээтэйгээр худалдахаар тохиролцсон тухай албан ёсоор мэдэгдлээ. 2022 онд байгуулсан “Rhode” брэнд нь минималист арьс арчилгааны чиг хандлагыг дэлгэрүүлж, “Peptide Glazing Fluid” зэрэг бүтээгдэхүүнүүдээрээ богино хугацаанд амжилтад хүрсэн билээ. Тус брэнд TikTok, Instagram зэрэг цахим сүлжээгээр дамжин хэрэглэгчдийн талархлыг хүлээж, 2024-2025 онд нийт 212 сая ам.долларын борлуулалт хийсэн байна. Худалдан авалтын нөхцөлд 600 сая ам.доллар бэлнээр, 200 сая ам.доллар e.l.f. компанийн хувьцаагаар   мөн ирэх гурван жилд борлуулалтын үр дүнгээс шалтгаалан нэмэлт 200 сая ам.доллар төлөгдөх заалт тусгагджээ. Хэдий брэндийг худалдаалж байгаа ч Хейли Бибер Chief Creative Officer, Head of Innovation болон стратегийн зөвлөх зэрэг гол үүрэг хариуцлагуудыг цаашид хашсаар байх аж. e.l.f. Beauty компанийн зүгээс Rhode-ийг улам өргөжүүлж, 2025 оны эцэс гэхэд Хойд Америк болон Их Британийн Sephora сүлжээ дэлгүүрүүдээр худалдаанд гаргах зорилготой байгаагаа илэрхийлсэн байна.