Нийслэлийн хэмжээнд үерийн эрсдэлтэй бүс нутгийн нэг болох Сэлбэ гол дагуух газруудад “Сэлбэ сэргэлт” төслийн хүрээнд түшиц хана барих ажил эрчимтэй үргэлжилж байна. Тус төслийн эхний ээлжийн бүтээн байгуулалтыг Баянзүрх дүүргийн 41-р хороо болон Сүхбаатар дүүргийн 1-р хорооны нутаг дэвсгэрт буюу Натур орчмоор гүйцэтгэж байгаа юм. Өнөөдрийн байдлаар нийт 1.4 км урттай, 4-4.5 метр өндөр төмөр бетонон түшиц ханы 1.2 км нь баригдаад байгаа бөгөөд үлдсэн хэсгийг 2025 оны зургадугаар сарын 30-нд багтаан дуусгахаар төлөвлөж байна. Төслийг “Билгүүн Монгол Констракшн” ХХК гүйцэтгэж байгаа бөгөөд нийслэлийн Хөрөнгө оруулалтын газар захиалагчийн зүгээс техникийн хяналтыг тавьж байгаа аж. Төслийн менежер Р.Дамба хэлэхдээ: “Бид Сэлбэ голын дагуу үерийн хамгаалалтын бүтээн байгуулалтыг хотын төвийн хамгийн эмзэг бүсүүдэд хийж байна. Шугам сүлжээний олон давхцал, инженерийн саад бэрхшээл байгаагаас хугацаа зарим талаар удааширсан ч ажлыг графикийн дагуу дуусгахаар шөнийн цагаар цутгалтын ажлыг гүйцэтгэж байна,” хэмээлээ. Үүнээс гадна түшиц хананы ажлыг дуусгасны дараа голын голдиролыг тохируулах, угаагдлаас сэргийлэх чулуун бэхэлгээ, хашлага хайс үерийн усны урсцыг тогтворжуулах зэрэг ажлуудыг наймдугаар сарын 30-нд багтаан дуусгах төлөвтэй байгааг НХОГ-ын гидротехникийн хяналтын инженер Э.Одчимэг мэдээллээ. Түүнчлэн түшиц хананы дагуух тохижилтын ажил ч мөн хийгдэх бөгөөд Улаанбаатар хотын Захирагчийн ажлын албаны холбогдох албаны дарга Г.Билгүүн: “Тохижилтын зураг төслийг Хот төлөвлөлт, судалгааны институт боловсруулсан. Ногоон байгууламж, гэрэлтүүлэг, амралтын хэсэг, явган болон дугуйн зам зэрэг иж бүрэн тохижилт хийхээр төлөвлөсөн бөгөөд одоогоор Барилгын хөгжлийн төвд магадлал хийгдэхийг хүлээж байна” хэмээн онцоллоо.