"Огцрох амархан" жагсаалын төлөөлөл УИХ-ын дарга Д.Амарбаясгалантай уулзсан билээ. Уулзалтын талаар "Ноорог креатив"-ын захирал О.Уламсайхан мэдээлэл өглөө.

Тэрбээр “Уулзалтын үеэр MPA агентлаг бичлэг хийсэн. Бид бүх зүйлийг бичиж авсан.  УИХ-ын даргын ажлын хэсэгт хүсэлт гаргаж, бичлэгийг бүрэн авч нийтэд түгээнэ. Үүнээс бүх хэвлэл авч цацах боломжтой. Би татварын мөнгөөр цалинждаггүй. Мөн ямар нэгэн байдлаар улсын төсөвт оролцож, улсын төсвийг захиран зарцуулах үүрэг гүйцэтгэдэггүй. Тиймээс би надтай холбоотой гарч байгаа мэдээлэлд хариу өгөх албатай субъект биш. Хоёрдугаарт жагсаалын шаардлагуудтай миний хувийн амьдрал, Ноорогт болсон үйл явдал огт хамаагүй. Үндсэндээ бид жагсаалын шаардлага, жагсаалын ёс зүйн зарчим, шаардлагуудаа биелүүлэхэд бат зогсож байгаа. Өргөн бүрэлдэхүүнтэй уулзсанд бид баяртай байна. Гэхдээ хүсэж байсан хариулалтаа бол 100 хувь авч чадаагүй” гэв.