Хамтарсан Засгийн газрын асуудлаар Ардчилсан намын дарга Л.Гантөмөр өөрийн байр сууриа илэрхийллээ.

Тэрбээр “МАН-ын бүлэг хуралдаж, Ардчилсан намыг Засгийн газраас гарах шийдвэр нь гарсан. Тийм учраас Ардчилсан нам Засгийн газарт ажиллахгүй. Одоо нөхцөл байдлыг яах вэ, хоёр арга байна. Ерөнхий сайд Ардчилсан намын найм сайдыг огцруулах эсвэл бид өөрсдөө өргөдлөө өгөх ёстой. Энэ асуудлыг ярихаар Ерөнхий сайд УИХ-д хандана гэж байгаа. УИХ-д юу яригдах вэ, Ерөнхий сайд өөрөө тэндээс томилогдсон шүү дээ. Ерөнхий сайдын асуудал ярьж байгаа болохоос хамтарсан Засгийн газрын асуудал яригдахгүй байна. Өнөөдрийн Засгийн газрын хурлаар тодорхой асуудлаа ярьсан. Монгол төрийн үйл хэрэг нэг минут , өдрөөр гацаж болохгүй. Нийгэмд байгаа хүлээлт юу вэ гэвэл МАН-ын шийдвэр байсан.  Энэ шийдвэрийн дараа ХҮН, МАН, АН намын дарга нар ярилцсан. Бид энэ шийдвэрийг хүндэтгэлтэй хүлээж авсан. Одоо Ерөнхий сайд шийдвэрээ гаргах хэрэгтэй” гэв.