Монгол Улсын Ерөнхийлөгчийн санаачилгаар дэлхийн уур амьсгалын өөрчлөлтийн нөлөөллийг бууруулах, ой, усны нөөцийг хамгаалж, нэмэгдүүлэх, экологийн тэнцвэрт байдлыг хамгаалах үүднээс мод тарих, ургуулах, арчлах ач холбогдлыг олон нийтэд таниулан сурталчлах, соён гэгээрүүлэх зорилго бүхий “Тэрбум мод” үндэсний хөдөлгөөний хүрээнд 2021 онд “Зөв мод-зөв арчилгаа”, 2022 онд “Байгалиа бүтээе”, 2023 онд “Мод тарьж байгалиа бүтээе”, 2024 онд “Хүн бүр мод тарьцгаая”, “Алтан намар мод тарих “цаг гэсэн аянуудыг улсын хэмжээнд амжилттай зохион байгуулсан.

Энэ жилийн хувьд Монгол Улсын Ерөнхийлөгчийн тамгын газар, Цагдаагийн ерөнхий газрын Экологийн цагдаагийн алба хамтран 05 дугаар сарын 15-ны өдрөөс 1 сарын хугацаатай “Хашаандаа мод тарья” нөлөөллийн аяныг улсын хэмжээнд зохион байгуулан ажиллаж байна.

Үндэсний мод тарих өдрүүд жил бүрийн 5, 9 дүгээр сарын 2 дахь 7 хоногийн бямба гарагт тохиодог байсан бол Монгол Улсын Ерөнхийлөгчийн энэ оны 44 дүгээр зарлигаар жил бүрийн тав, есдүгээр саруудын Бямба, Ням гарагуудыг тэрбум мод тарих үндэсний өдөр болгон зарласан нь  бүх нийтээр мод, сөөг тарих, арчлан ургуулах ажилд олон нийтийн оролцоог нэмэгдүүлэх эерэг нөлөөтэй.

 Тэрбум мод үндэсний хөдөлгөөн нь доройтсон ойг нөхөн сэргээх, цөлжилт, газрын доройтол, хөрсний элэгдсэн эвдрэлийн эсрэг хамгаалалтын зурвас байгуулах, хот суурин газарт ногоон байгууламж байгуулах гэсэн 3 зорилгын хүрээнд зохион байгуулагдаж байгаа бөгөөд энэ жилийн хувьд хот суурин газарт ногоон байгууламж байгуулах тэр дундаа хашаандаа мод тарих, арчлах, ургуулах чиглэлээр “Мод тарих хамгийн ойр газар бол таны хашаа” уриалга гаргаж, иргэд олон нийтэд мэдээлэл бэлтгэн хүргэж байна.

Үндэсний хөдөлгөөн өрнөж эхэлснээс хойш энэ хаврын тариалалтыг тооцохгүйгээр улсын хэмжээнд нийт 100 орчим сая модыг тарьж, ургуулаад байгаа бөгөөд өнгөрсөн онд нийт таригдсан содны ургалтын байдалд дүн шинжилгээ хийхэд 80-85 хувийн ургалттай байгаа гэсэн дүгнэлт гарсан.

Мөн түүнчлэн үндэсний хөдөлгөөн хэрэгжиж эхлэхээс өмнө манай орны ойгоор бүрхэгдсэн талбай нийт газар нутгийн 7.9 хувийг эзэлж байсан бол тус хөдөлгөөн хэрэгжиж эхэлснээс хойш ойгоор бүрхэгдсэн талбай 13.217.2 мян.га болсон бөгөөд энэ нь нийт нутаг дэвсгэрийн 8.45 хувь болж өөрчлөгдсөн.

Иймд иргэд, байгууллагыг дээрх арга хэмжээнд идэвх санаачилгатай оролцож, Хашаандаа мод тарихыг уриалж байна.