Хүүхдийн баяр бол хүүхэд бүрийн хамгийн их хүлээдэг, гэр бүлээрээ тэмдэглэдэг онцгой өдөр. Энэ өдрийг зөвхөн тоглоом эсвэл бэлгээр бус, сэтгэлд үлдэх дурсамжаар дүүрэн өнгөрүүлэх боломжтой. Ингээд та бүхэнд зургадугаар сарын 1-нд хүүхэдтэйгээ хамт хийх таван сонирхолтой санааг хүргэж байна.

“Үлгэрийн ертөнцөд зочильё”

Хамгийн мартагдашгүй хүүхдийн баяр бол агаар салхинд гэр бүлээрээ хамтдаа өнгөрүүлэх билээ. Цэцэрлэгт хүрээлэн, амралтын бүсэд гэр бүлээрээ очиж, хүүхдийн дуртай үлгэр, киноны дүрээр хувцаслаж “сэдэвчилсэн пикник” зохион байгуулж болно. Бага зардлаар ч бүтээлч уур амьсгал бүрдүүлж болно.

Гар урлал, зураг, бүтээл хийх

Хүүхдийн бүтээлч сэтгэлгээг хөгжүүлэхэд гар урлал, зураг гэр бүлээрээ хийж илүү бүтээлчээр өнгөрүүлэх боломжтой. Энэ өдөр бүхнийг мартан хүүхэдтэйгээ хамтдаа зураг зурж, хайчилж, нааж, сэтгэж, бүтээх цаг гаргаарай. Таны хамт өнгөрүүлсэн цаг хүүхдийн хамгийн үнэт бэлэг болж үлдэнэ.

“Эрдэнэсийн эрэл” тоглоом

Хүүхэд адал явдалт тоглоомд дуртай. Гэртээ эсвэл гадаа жижиг бэлгүүдийг нууж, газрын зураг эсвэл даалгавар өгч, эрдэнэс олох хайгуул хийлгээрэй. Хүүхэд бүр оролцож болох олон шаттай болгох нь зүгээр. Энэ нь хүүхдийн анхаарал төвлөрөл, логик сэтгэлгээ, багаар ажиллах чадварыг хөгжүүлдэг.

Нийслэлд болох баярын арга хэмжээнд хамтдаа оролцох

Жил бүр хүүхдийн баяраар нийслэл болон орон нутгуудад олон нийтийн баярын арга хэмжээнүүд зохион байгуулагддаг. Концерт, тоглолт, хүүхэлдэйн кино үзвэр, номын үзэсгэлэн, тоглоомын талбайн үйл ажиллагаа гэх мэт олон сонголт бий. Энэ төрлийн арга хэмжээ хүүхдэд нийгмийн идэвх, олон найзтай болоход тус болдог.

Үлгэрийн оройн цаг

Өдрийн баярын дараа гэртээ гэр бүлээрээ тухлан хүүхдийн дуртай кино үзэх эсвэл үлгэр ярьж өгөх “Үлгэрийн оройн цаг”-ийг уламжлал болгоорой. Шөнийн гэрэл, зурагт, дэрэн дунд суун инээж, ярьж, ярилцах нь ямар ч үнэтэй бэлгээс илүү дурсамж болно. Энэ нь хүүхдийн сэтгэхүйг баяжуулж, уран илтгэл, өөрийгөө илэрхийлэх чадварт нөлөөлдөг.