-ТАЛИЙГААЧИЙН ААВ: "ЧАНДМАНЬ УУШИР" ХХК-ИЙГ С.БЯМБАЦОГТ САЙДЫН ОХИН КОМПАНИ ГЭЖ СОНССОН-

      Ховд аймагт баригдаж байсан таван давхар барилгаас 11 хүн унаж, гурав нь газар дээрээ нас барсан харамсалтай хэрэг энэ сарын 17-н гарсан байдаг. Тус барилгыг “Чандмань уушир” ХХК-ийнхан барьж байсан бөгөөд хөдөлмөрийн аюулгүй байдлыг хангаагүйгээс олон хүн амь, эрүүл мэндээрээ хохироод байгаа аж. Тухайн осол чухам юунаас болсон талаар талийгаач А-ны аав Б.Мөнхжаргалаас тодрууллаа.

-Танай гэр бүлийнхэнд гүн эмгэнэл илэрхийлье. Хүү нь “Чандмань уушир” ХХК-д хэчнээн жил ажилласан бэ. Юунаас болж амиа алдсан юм бэ?

      -Хүү минь “Чандмань уушир” ХХК-д тав дахь жилдээ ажиллаж байсан юм. Тавдугаар сарын 17-ны16:00 цагт цайндаа орчихоод ажлаа хийж байгаад амиа алдсан.  4-5 хүн явах ёстой өргөгч подемд 11-үүлээ сууж, таван давхарт гарсан юм билээ. Тэднийг бууж амжаагүй байтал тросс нь тасарч, гурван хүн газар дээрээ амиа алдсны нэг нь миний хүү. Үлдсэн нь яаралтай эмнэлэгт хүргэгдсэн гэсэн. Тэд хагалгаанд орсон боловч биеийн байдал нь сайнгүй байгаа гэсэн. Хөдөлмөрийн аюулгүй байдлыг хангах ёстой хүн нь даац хэтэрчихээд байхад нь подемын кнопыг дарсан юм билээ.

-Хүү нь өмнө нь ажлаа хийж байхдаа бэртэж, гэмтэж байсан уу. “Чандмань уушир” компани танай аймгийн барилга, байгууламжийн ажлыг байнга хариуцаж хийдэг юм уу?

     -Хүү минь хоёр жилийн өмнө мөн энэ компанийн барилга дээр ажиллаж байхдаа хөлөө гэмтээж байсан. “Чандмань уушир” ХХК манай аймагт төдийгүй Баян-Өлгий аймагт байнгын үйл ажиллагаа явуулдаг юм билээ. Удирдлага, захирал нь ямар хүн байдгийг би сайн мэдэхгүй болохоор тодорхой мэдээлэлгүй байна. Манай аймгийн сумдад хүртэл барилгын ажил явуулдаг юм билээ. Тэгэхээр манай аймгийн нэр бүхий улстөрчийн компани ч байж болзошгүй. 

“Чандмань уушир” ХХК-ийнхан та бүхэнтэй уулзсан уу. Мөрдөн шалгах ажиллагаа хэрхэн үргэлжилж байгаа вэ?

     -Талийгаачид задлан шинжилгээ хийсэн. Шүүх шинжилгээний хариу 14 хоногийн дараа гарна гэж цагдаа нар хэлсэн. “Чандмань уушир” ХХК-ийнхан ажил явдлынх нь үеэр ирсэн. Бидэнд ямар нэгэн тодорхой тайлбар хэлээгүй. Харин аймгийн Засаг дарга тус барилгын үйл ажиллагааг үргэлжлүүлж, дуусгаад талийгаач нарын ар гэрийнхэнд нөхөн олговор болгож, орон сууц олго гэсэн асуудал ярьсан байна лээ. Бид сайхан хүүгээ алдсан газар юу бодож, яаж амьдрах юм бэ. Биднийг тэгтлээ дээрэлхэж, дорд үзэж болно гэж үү. Буян номын ажил дуусахаар хуулийн хүмүүстэй холбогдож, холбогдох хууль, журмын дагуу өргөдөл бичнэ гэж бодож байгаа. Мөн даац нь хэтэрчихээд байхад подемын кноп дарсан ХАБ-ын ажилтнаас болон “Чандмань уушир” ХХК-ийнхнаас хүүгийнхээ амийг нэхнэ. Бусад талийгаачдын ар гэрийнхэн болон, эрүүл мэндээрээ хохирсон иргэд ч гомдолтой байгаа байх. Хүнээ алдчихсан хүмүүс “годмолгүй” гээд сууна гэж байхгүй биз дээ. Хүүгээ алдсан аавын хувьд би тун харамсаж байна. Хууль, шүүхийнхэн энэхүү хэргийг үнэн зөвөөр шийдэж өгөөсэй гэж чин сэтгэлээсээ хүсэж байна.

-Талийгаач танай хэд дэх хүүхэд вэ?

     -Манайх зургаан хүүхэдтэй. Талийгаач минь том нь байсан юм. Хүүгээ 30-хан настайдаа зуурдаар нас барсанд нь харамсаад харамсаад баршгүй юм. Хүү минь зургаан настай, хоёр сартай хоёр жаахан хүүхэдтэй. Манайхтай нэг хашаанд амьдардаг байсан юм. Хоёр нялх үрийг нь харахаар гол зураад, хоолой зангираад  хэцүү юм. Том нь ирэх намар сургуульд орно.

      Бид Ховд аймгийн Засаг дарга М.Амарсанаатай холбогдож, хэргийн талаар тодруулахад “Тус компанийн ажилчид өөрсдийн болгоомжгүй байдлаас болж амиа алдсан юм билээ. “Чандмань уушир” ХХК-ийнхан ямар нэгэн тендерт шалгарч, манай аймгийн барилгыг бариагүй. Өөрсдийнхөө орон сууцыг барьж байсан. Ховд аймагт нэр хүндтэй, жил бүр татвараа төлдөг компани байсан” гэсэн юм.