Монгол, БНСУ-ын залуу уран бүтээлчдийн хамтарсан “Хайр-Мод” тоглолт энэ сарын 28-нд болох билээ. Тус тоглолтын “Хайр” хэсгийн гол дүрийн бүжигчин Э.Ангарагтай ярилцлаа.

-Танд энэ өдрийн мэнд хүргэе. Манай уншигчдад өөрийгөө танилцуулаад яриагаа эхлэх үү?

                - Сайн байна уу, Булган аймгийн Хутаг-Өндөр суманд төрж өссөн. Энхмөнх овогтой Ангараг гэдэг. Одоогоор Соёл урлагийн их сургуулийн Бүжгийн урлагийн сургуулийн хоёрдугаар курст суралцаж байгаа.

-БНСУ-ын балетчидтай хамтарсан “Хайр-мод” балетын гол дүрд бүжиглэж байгаа сэтгэгдлээ хуваалцахгүй юу?

                -Гадаадын чадвартай бүжигчидтэй хамт тайзан дээр гарч байгаа учраас миний хувьд хувьд маш том боломж, шалгуур юм болов уу гэж бодож байгаа. Мэдээж гол дүр нь болж энэ том тоглолтод орж байгаадаа туйлын их баяртай байгаа. Тэр хэрээрээ нэлээдгүй сандрал, айдастай байна.

-“Хайр-мод” балетын таны дүрийн онцлог юу вэ. Дүрийнхээ онцлогийг та өөрийнхөөрөө хэрхэн илэрхийлсэн гэж бодож байна вэ?

                -“Хайр-Мод” тоглолт нь энэ жилийн хувьд хоёр хэсэгтэй тоглолт болж явагдаж байгаа. Үүний “Хайр” гэх хэсэгт гол дүрийн бүжигчин хийж байгаа. Надтай хамт Оросын холбооны Улан Үдэ-ээс ирж суралцаж байгаа Селинна хамтарч байна. “Хайр” хэсгийн тоглолтод орчин үе, модерн бүжгийн төрлөөр орж байгаа. Бид хоёрын бүжиг ерөнхийдөө арван жилийн хайр, анхны хайрын тухай үгүйлнэ. Би ангийнхаа хөөрхөн охинд анх харсан цагаасаа шохоорхож тэр нь явсаар хайр бас хагацал болоод дуусаж байгаа. “Би чамд хайртай” киног үзсэн хүмүүст их ойрхон хүрэх болов уу гэж бодож байна. Бүжгийн ая нь хүртэл “Би чамд хайртай” киноны дуу байгаа.

-Хоёрдугаар курсийн оюутан юм билээ. Оюутан байх хугацаандаа бүжгэн жүжгийн гол дүрд шалгарах ямар байсан бэ?

                - Тиймээ. Мэдээж баяртай байгаа. Гол дүр гэдэг мэдээж том зүйлээ миний хувьд үүнд сонгогдсондоо баяртай байж, хариуцлагатайгаар ажиллахыг хүсэж, бэлдэж байна.

-Яагаад балетын урлагийг сонгож суралцахаар шийдсэн бэ. Юу нөлөөлсөн бол?

                - Би тавдугаар ангид байхаасаа бүжиглэж эхэлсэн. Багаасаа бүжигт дуртай, хайртай хүү болж өссөн тэр утгаараа энэ хүртэл ирж Бүжгийн сургуульд орсон байх. Эргэлзэх зүйлгүйгээр мэргэжлээ сонгосон.

-Тайзан дээр анх ямар дүрээр гарч байсан бэ. Ямар мэдрэмж авч байсан бэ. Хамгийн дурсамжтай тайз нь ямар уран бүтээлийн тайз байсан бэ?

                - Хамгийн анх Жалам хар бүжгээр тайзан дээр гарч байлаа. Тухайн тэмцээнд гурван насанд оролцож Алт, мөнгө, хүрэл гээд гурван өнгийн медаль авч “Өсөх ирээдүйтэй бүжигчин”-ээр шалгарч байсан. Тэр үед болсон тэмцээн, тайзыг мартахгүй байж чаддаггүй юм.

-Урлаг хүнийг тэсвэр тэвчээртэй, хатуужилтай болгодог гэж ярьдаг. Өөрөөр яаж нөлөөлдөг бол?

                - Тиймээ, урлагийн хүмүүст үнэхээр тэсвэр хатуужил гэдэг зүйл суудаг гэж боддог оо. Үүнээс гадна цаг барих, олонтой нийцтэй хамт байх гэх мэт хувь хүний хөгжлийг маш сайн зааж өгдөг.

-Балет нь бусад төрлийн бүжгээс ямар ялгаатай вэ. Өмнө нь өөр төрлийн бүжгээр хичээллэж байв уу?

                - Би балет буюу Сонгодог бүжгийн хичээлийг судлаад хоёр жил болж байна. Балетын дасгал хичээл нь яг бүх бүжгийн суурь болж өгдөг. Өмнө нь Монгол ардын бүжгээр хичээллэж байсан.

-Хайрлаж, хүндэлж явдаг уран бүтээлч олон бий  байх. Та хэнээс үлгэр дуурайлал авдаг вэ?

                - Миний хувьд хайрлаж, хүндэлж үлгэр дуурайлал авдаг олон хүн бий. Тэр дундаас Манай сургуулийнхаа н.Энхгэрэл, н.Гэрэлттуяа багш нараасаа ихээхэн зүйлсийг сурч, мэдэж авсан. Надад цаашид ч сурах олон зүйл байгаа гэж боддог. Мөн намайг бага байхаас минь өөр дээрээ авч энд ирэхэд тусалсан н.Бямбацэцэг бүжгийн багшдаа маш их хайртай.

-Та бүжгийг өөрийнхөөрөө хэрхэн тодорхойлох вэ?

                -Бүжгийг хэдэн үгээр хэл гэвэл. Бүжиг гэдэг нь үг, хүмүүс бас мэдрэмж гэх юм болов уу. Миний хувьд хэлж үйлдэж, гаргаж чаддаггүй мэдрэмжүүдээ биеэрээ илэрхийлэх гэдэг нь ихээхэн сайхан санагддаг аа. Нэг талаараа тун тухтай мэдрэмж.

-Таны дараагийн зорилго төлөвлөгөө юу вэ?

                - Дараагийн зорилго гэвэл надад одоохондоо хичээх, суралцах л гэсэн үгс байна даа. Сурч мэдэх зүйлс асар их байгаа. Тэр бүрийг шантралгүй авч чадвал. Хүсэл мөрөөдөл, цаашдын бүхэн саадгүй бүтнэ гэж боддог.