Үүсээд буй нөхцөл байдалтай холбоотойгоор Ардчилсан намын дарга Л.Гантөмөр мэдээлэл өглөө.

Тэрбээр “Ардчилсан одоо улс төрийн зөвлөлөө хуралдуулж, шийдвэрийн талаар ярих гэж байна. Улсынхаа эрх ашгийг нэгт тавьсан бодлого л хэрэгжүүлэх нь чухал. Би МАН энэ үзэл санаанаас урвачихлаа гэж харж байна. АН хүчтэй сөрөг хүчний ажлаа хийгээд явна, энэ ойлгомжтой. Тэгэхээр бид хуралдаад дараа, дараагийн хариуцлагын асуудлаа ярина. Улс төрийн зөвлөлөөс Үндэсний бодлогын хороогоо хуралдуулах шийдвэр гаргана. Би тийм саналд оруулж байгаа юм. Намын даргын хувьд би хамтарсан Засгийн газар байгуулж, улсынхаа эрх ашгийг нэгт тавьж, хурдтай хөгжлийн төлөө зориг гаргаж явна гэдэгт итгэсэн. МАН-ыг арай өөр нам болсон болов уу гэж горьдсон. Харамсалтай нь хэдэн суудал, албан тушаалын төлөө улсын эрх ашгийг уландаа гишгэж байна. Би хамтарсан Засгийг урьсан, бодлого гаргасан намын даргын хувьд хариуцлага хүлээж намын даргын ажлаа өгнө. Үндэсний бодлогын хороо ойрын үед хуралдаж, одоо байгаа дүрмийн хүрээнд асуудлаа шийдэх учиртай. Би намынхнаасаа нэг зүйлийг хүснэ. Хэтэрхий улс орныхоо эрх ашгийг уландаа гишгэсэн улс төр битгий хийгээрэй. Яагаад гэвэл бидний сонгуулиар иргэдиэд амласан амлалтууд өнөөдрийн Засгийн газрын хөтөлбөрт орчихсон яваа шүү. Ардчилсан нам гэрээ зөрчөөгүй. Би 13:00 цагт МАН-ын дарга Ерөнхий сайд Л.Оюун-Эрдэнэтэй уулзана. Гэрээн дээр хамтын хариуцлага гэсэн үг байгаа. Мөрийн хөтөлбөрт туссан зүйлийг эцсээ хүртэл хийнэ гэсэн гэрээний заалт байгаа. Үүнээсээ хамтарсан Засгийн газар урваагүй. АН энэ үед эв эеийг хичээх хэрэгтэй. Гурван намын дарга уулзаад ямар түвшинд хариуцлага хүлээх вэ гэдгээ шийднэ” гэв.