Засгийн газрын ээлжит хуралдаанаас гарсан шийдвэрийг танилцуулж байна. Энэ үеэр Түгжрэлийн сайд Р.Эрдэнэбүрэн мэдээлэл өгч, сэтгүүлчдийн асуултад хариуллаа.

Тэрбээр “Гэр хорооллыг дахин төлөвлөлт, түгжрэлийг бууруулах тухай хуульд өөрчлөлт оруулах багц хуулийн төслийг ирэх долоо хоногийн Засгийн газрын хурлаар хэлэлцүүлж, УИХ-д өргөн барих чиглэл өглөө.

Улаанбаатар хотын түгжрэлийг бууруулахын тулд бид сайн төлөвлөх хэрэгтэй байна. 2040 гэж олон жил яригдсан хот төлөвлөлтийн асуудлыг УИХ-д өргөн барьсан, хэлэлцэж байгаа. Энэ 2040 хуулийг Хот, тосгоны эрх зүйн байдлыг тухай хуультай хамтад нь уялдаатай хэлэлцүүлэх үүднээс зургадугаар сарын 1-ээс хэрэгжиж эхлэх гэж байсан Хот, тосгоны эрх зүйн байдлын үйлчлэл хугацааг нь нэг жил хойшлуулсан. Ингэхээр төлөвлөлтөө аль аль талаас нь уялдаатай хийж авах юм бол дараа, дараагийн хөрөнгө, зураг төслийн асуудлууд яригдаж эхэлнэ. Туулийн хурдны замын тендер зургадугаар сарын 19-нд  нээгдэнэ. Ямар нэгэн саад гарахгүй бол 22 сарын хугацаанд хийгдэнэ. Түгжрэл гэдэг нэг зуны дотор шийдэгдэх асуудал биш. Туулийн хурдны зас, тойрог зам хоёр хийгдэх юм бол бидний гаргасан тооцоогоор түгжрэл 50 хувь буурна. Энэ хоёр төслийг шуурхай хийх тал дээр байнга ярилцаж байгаа” гэв.