Хамтарсан Засгийн газар АН, Хүн намыг гаргах асуудлыг МАН-ын бага хурлаар шийдэхээр болсон. Үүнтэй холбоотойгоор сэтгүүлчид гишүүдээс байр суурийг нь тодрууллаа.

УИХ-ын гишүүн О.Батнайрамдал  “Сүүлийн 30 жилийн алдаа оноог авч үзвэл том төслүүд буюу Монгол улс хөгжих үү, үгүй юу гэдэг дээр очдог. Өнөөдөр уул уурхай болон байгалийн баялаг ард түмний өмчөөс хэт хамааралтай болсон. Буцаад ард түмэндээ шударга хуваарилагдах уу гэдэг гол асуудал байна. Олон жил баялгийн сангийн асуудал яригдсан. Үндэсний баялгийн сангийн хууль нь хэрэгжээд, өнөөдөр мөнгө төлөөд хэрэгжүүлэх болохоор “Засгийн газар огцор” гэдэг байдал руу орж байна. Бүгдээрээ Монгол улсын эрх ашгийн төлөө нэгдэх хэрэгтэй. Монгол Улсын эрх ашиг нэгдүгээрт тавигдах ёстой. Засгийн газар Монгол Улсын эрх ашгийн төлөө хамтраад хоёр том төсөл явуулаа. 18 жил гацсан “Гашуун сухайт- Ганц мод” боомт буюу олон тэрбумын асуудлыг хөндсөн төмөр зам дөнгөж нээлтээ хийж байхад засгийн газар огцрох болчихоод байна. Ганц нэг компанийн хувийн эрх ашгийн төлөө төр өөрөө бөхийж болох уу. Дахиад Засгийн газар огцрох болж тогтворгүй болдог. Төслүүд буцаад асуултын тэмдэг болоод үлддэг болж болохгүй. Хамтарсан Засгийн газрын үед олон жил гацсан төслүүдийг урагшлуулж чадлаа. Хэрвээ энэ чигээрээ ахиад жаахан хугацаагаар урагшилбал дэмжинэ. Яагаад гэвэл том төслүүд явж байж Монгол Улсын эдийн засагт эерэг нөлөөтэй” гэв.