Нийгэмд үүсээд буй нөхцөл байдлын талаар УИХ-ын Ёс зүй, дэгийн байнгын хорооны дарга Б.Баярбаатар байр сууриа илэрхийллээ

Тэрбээр “Засгийн газрын үйл ажиллагааны тайланг МАН-ын Бага хурал хэлэлцэнэ. МАН-ын Бага хурал бол дүрмийн дагуу жилд нэгээс доошгүй удаа хуралддаг. Дүрмийн дагуу зургадугаар Бага хурлаа тавдугаар сард зарлаж байна гэж ойлгож байна. Энэ хурал дээр Ерөнхий сайд Засгийн газрын тайлангаа танилцуулах байх. Бага хурлын 400 орчим гишүүн дотоод ардчиллын дагуу асуулт асууж, санал илэрхийлнэ. Энэ хүрээнд нийгэмд үүсээд байгаа асуудлууд дээр ч ярилцах байх. Миний хувьд бага хурал, удирдах зөвлөлийн гишүүн биш учраас Бага хуралд хөндлөнгийн ажиллагчаар оролцоно. Би гадаа жагсаж байгаа залуусын үзэл бодлоо илэрхийлж байгааг байдлыг дэмжиж байна. Нийгмийн амьдралын түвшин ямар байгааг хүн бүр мэдэж байгаа. Татварын дарамт өндөр байгааг, айл, өрхийн амьжиргаа ямар байгааг мэднэ. Гэтэл цахим сүлжээнд хэт тансагласан бодит зураг бичлэгээ оруулж байгаа нь нийгэмд бухимдал үүсгэж байна. Хууль хяналтын байгууллагын шалгалт  эхэлсэн гэж харж байгаа. Ерөнхий сайдын хэлж байгаагаар хүү нь 23 настай, эрхзүй, хуулийн өмнө бүрэн хариуцлага хүлээх чадамжтай юм билээ. Тэр хүн өөрөө орлогоо нотлох ёстой, өөрөө мэдүүлэг, мэдээллээ өгөх ёстой. Үүний дараа хууль, шүүхийн байгууллага нь үнэхээр гэмт хэргийн шинжтэй нөхцөл байвал үргэлжлүүлэн шалгаж, гэм буруутайд тооцтол бид хэнийг ч буруутай гэж үзэх эрх зүйн орчин байхгүй. Жагсагчид үзэл баримтлалаа илэрхийлж байгаа, сүүлийн өдрүүдэд Засгийн газар огцор гэсэн байр суурьт орсон байна лээ. Би ч гэсэн цахим сүлжээнээс авсан мэдээлэлтэй байгаа. Янз бүрийн уулзалтад нь ороогүй учраас Ерөнхийлөгчтэй уулзлаа, шаардлага тавилаа гэдэг мэдээлэл дээр тодорхой мэдсэн зүйлгүй байна.

Хамтарсан Засгийн газар яах гэж байгуулагдсан юм бэ гэдэг асуудлаас эхлээд ярина. Өнгөрсөн 30 жилийн хугацаанд улс орны хөгжилд чөдөр тушаа болоод байсан олон асуудлын гол нь улс төрийн талцаж, хуваагдах байдал. Л.Оюун-Эрдэнээр ахлуулсан Засгийн газар өнгөрсөн хугацаанд улс төржилтөөс болж гацсан төслүүдийг хэрэгжүүлэх зайлшгүй шаардлагатай байна. Ингэж байж улс хөгжиж, эдийн засаг тэлэх юм байлаг агуулга дээр хандсан. Монгол Улсын Ерөнхийлөгч У.Хүрэлсүх “Баялагтаа эзэн Монгол” гэсэн уриаг дэвшүүлж ялалт байгуулсан. Үүний дагуу баялгийн сангийн тухай хууль батлагдсан. Энэ хуулийн гол конвенц нь байгалийн баялаг бол ард түмний өмч, нөгөө талаараа байгалийн баялгийг иргэн бүрд тэгш хуваарилах хуулийн зохицуулалтыг хийж өгсөн. Энэ хүрээнд улсын төсвийн хөрөнгөөр хайгуул хийж, нөөцийг нь тогтоосон стратегийн ордуудын 34-51 хувийг баялгийн сандаа төвлөрүүлж, тодорхой хуваарилалтын дагуу иргэддээ тэгш боломж бүрдүүлье гэдэг хуулийн хэрэгжилтийг хангахын тулд Засгийн газар ажиллаж байна гэж харж байгаа. Хуулийн хэрэгжилтэд сөргөөр нөлөөлөх, сөргөлдөх агуулга гарч байгаа. Энэ бол нийгэмд байдаг зүйл. Хамгийн гол нь ярилцаж, ойлголцох хэрэгтэй. Хэрүүлд ялагч байдаггүй шиг улс төржилтөд ч ялагч байдаггүй” гэв.