Тайзны гэрэл тусах тэр мөч бол уран бүтээлчийн олон сарын хөлс хөдөлмөр, сэтгэлийн хүчээр бүтсэн дүрээ амилуулах агшин юм.  “Гэгээн Муза-18” наадамд нэр дэвшигчдээс дараах уран бүтээлчдийг онцлон танилуулж байна.

“АСАРЫН ӨНДӨР” ЖҮЖГИЙН ХАСУН ХАТНЫ ДҮРЭЭР ЖҮЖИГЧИН  Б.ТОГТОХЖАРГАЛ

      “Асрын өндөр” жүжгийн чухал нэгэн дүр бол яах аргагүй Хасун хатан. Энэхүү түүхэн эмэгтэйн дүрийг Улсын драмын эрдмийн театрын жүжигчин Соёлын тэргүүний ажилтан Б.Тогтохжаргал бүтээж, “Гэгээн Муза-18” наадамд “Шилдэг эмэгтэй гол дүр” номинацид нэр дэвшээд байна. Тус жүжгийн Завхан аймгийн Хөгжимт драмын театрын уран бүтээлчид үзэгчдийн хүртээл болгоод буй билээ. Хасун хатан бол дөлгөөн төрхтэй, хатан ухаантай эмэгтэй. Энэ ч үүднээс уран бүтээлчээс дүрийн шилжилт, түүхэн эмэгтэйн тэвчээр, тэмцэл, үнэнч сэтгэлийн илэрхийлэл мэдрэгдэж байсан. Түүнд амжилт хүсье.

“ШЕЛКУНЧИК” ЖҮЖГИЙН НАЙРУУЛАГЧ Б.АНХБААТАР

          Э.Т.А.Хоффманны алдарт үлгэрээс сэдэвлэн бүтээсэн “Шелкунчик” жүжиг нь хүүхдүүдийн төсөөллийг өдөөж, тэдний шинэ жилийн дурсамжийг хөглөсөн. Жүжигт ашигласан тайзны уран бүтээл, хувцасны дизайн, хөгжмийн зохиомж нь бүгд нэгдмэл зорилготой, хүүхдүүдийг ид шидийн ертөнцөөр аялуулж, сайн мууг ялгахад чиглэсэн нь онцлог байв. Хүүхдийн сэтгэлзүй, үлгэрийн логик, тайзны уран бүтээлийг нэгтгэн найруулснаараа онцлог найруулагч Б.Анхбаатарт амжилт хүсье. Тэрбээр энэхүү жүжгийн найруулгын ажиллагаараа “Гэгээн муза” наадамд нэр дэвшиж буй юм.

“1984” ЖҮЖГИЙН ЖУЛИЯГИЙН ДҮРИЙГ БҮТЭЭСЭН МУГЖ Д.ГАНЦЭЦЭГ

        “Гэгээн Муза-18” олон улсын театрын наадамд “Орфей” театрын “1984” жүжгийн Жулиягийн дүрээр шилдэг эмэгтэй жүжигчний номинацид МУГЖ Д.Ганцэцэг нэр дэвшиж байна. Жулия үзэгчдэд дотоод сэтгэлийн ээдрээтэй холбоос, нийгмийн хяналт, хувь хүний эрхийн асуудлыг хүчтэй илэрхийлсэн.  Түүгээрээ тэр энэ наадмын гарцаагүй хүчтэй өрсөлдөгч юм. Нийгмийнхээ хатуу харгис байдлыг дагахаас өөр аргагүй хувь тавилантай ч хүнийг хайрлах сэтгэл зүрхээ гээгээгүй. Хэсэгхэн ч болов хайр дурлалын амтыг мэдэрсэн Жулия одоо ч үзэгчдэд дотно санагдсаар буй.

“ГАХАЙН ГАНЦ ТООРОЙ” ЖҮЖГИЙН ДҮРЭЭРЭЭ НЭР ДЭВШИЖ БУЙ ЖҮЖИГЧИН Ү.УУГАНБАЯР

Баянхонгор аймгийн “Тэмүүжин” театрын жүжигчин Ү.Ууганбаяр  “Гахайн ганц тоорой” жүжгийн дүрээрээ “Гэгээн Муза-18” олон улсын театрын наадмын шилдэг эрэгтэй жүжигчний номинацид нэр дэвшээд байна. Ү.Ууганбаярын бүтээсэн дүр нь дүрслэл, сэтгэл хөдлөлийн гүн гүнзгий харилцан хамаарлыг илэрхийлснээрээ онцлог байна. Мөн гахайн тоорой, бүтээлч амьдралын мөрөөдөл, зовлон шаналлыг амьдралын өнгө төрхөөр илэрхийлсэн. Тэрбээр жүжигтээ харилцан яриа, биеийн хэлэмжийг маш сайн ашиглан үгийн утга, дүрийн онцлогийг бүрэн нээж чадсан юм. Түүнд амжилт хүсье.