Хотын даргын шийдвэрээр ТҮЦ нурааж, нэг давхрын үйлчилгээний газруудыг хаана, хориглоно гэж захирч яваа. Харин өнгөрсөн амралтын өдрөөр "Оргил МГЛ" ХХК-ийн барилгыг хүч хэрэглэн нураасан. Тус бичлэг олон нийтэд ил болж, иргэдийн бухимдлыг төрүүлээд зогсохгүй айдаст автуулж байгаа. Энэхүү үйл явдлаас болж бизнес эрхлэгчид хэзээ газаргүй болчих бол, хэзээ үйлчилгээний газрыг маань нураачих бол гэх айдаст автчихсан сууж байгаа. Газрын гэрчилгээ, зөвшөөрөл байгаад ч хотын даргын хүслээр хэзээ ч орох оронгүй болж мэдэх нөхцөлд нийслэлчүүд амьдарч байна гэх шүүмжлэл олны дунд гарсан. “Оргил МГЛ” ХХК-ийн эзэмшигч Б.Дэлгэрзаяа “Миний аавын хүч хөдөлмөр, залуу насаа зарцуулан байж өөрийн болгож авсан газрыг хотын даргын шийдвэрээр гэх нэрийдлээр албадан буулгасанд харамсаж байна. Өнөөдөр зөвхөн манай газрын цагдаа нараар хамгаалуулж, хүч хэрэглэн буулгаж байгаа хэдий ч маргааш хэний ч  хэчнээн төгрөгийн эд хөрөнгийг буулгахыг үгүйсгэхийн аргагүй. Тийм учраас нийслэлчүүдийг нэгдэн нийлж өөрсдийнхөө эрх ашгийг хамгаалах ёстой гэж бодож байна. Бас НЗДТГ-ынхан биднийг байхгүйд барилгыг минь нурааж байгаа. Бид бусдын адил худалдаа үйлчилгээ явуулах зорилготойгоор барилгаа барьж байсан. Бид өөрсдийн хөдөлмөрөөр барьж байгаа болохоор авилгачид шиг хоёр, гуравхан жилийн дотор бариад дуусгаж чадаагүй. Харин эрх мэдлээ урвуулан ашигласан дарга нарт өөрсдийн эд хөрөнгөө хураалгалаа. Өнгөрсөн амралтын өдрүүдээр 1.3 тэрбум төгрөгийг минь юу ч үгүй болгосон гээд бодохоор монголчууд эд хөрөнгөө хамгаалах эрхгүй болчихоод байна" гэсэн юм. 

     Харин НЗДТГ-аас “Сүхбаатар дүүргийн Нэгдүгээр хороонд төв талбайн урд байрлах хуучин Ленин клубийн барилгыг 1929 онд барьж ашиглалтад оруулсан. Хамгийн сүүлд 2006 онд барилгын доорх газар 10610 ам.метр талбайгаар бүртгэгдэж, 2018 оноос хойш үйл ажиллагаа эрхлэгч, газрыг ашиглагчдад цөөнгүй өөрчлөлт орж эхэлсэн байдаг. Өөрөөр хэлбэл, хуучин Ленин клубийн газар ОХУ-ын өмчийн үл хөдлөх хөрөнгөд бүртгэлтэй байсныг залилж, тухайн газраас хууль бусаар эзэмшсэн байж болзошгүй асуудалд Эрүүгийн хэрэг үүсгэн, хэрэг хянан шийдвэрлэх ажиллагаа явагдаж байна. Уг асуудалтай холбогдуулан өнөөдөр хуучин Ленин клуб байрлаж байсан объектын залгаа байршилд зөвшөөрөлгүйгээр барилгын каркас угсарч байсан “Оргил МГЛ” ХХК-ийн барилгыг албадан буулгаж, газрыг чөлөөлж байна. НЗДТГ-ын дарга Д.Амгалан болон холбогдох албаныхан байршил дээр нь ажиллалаа. Тодруулбал, “Оргил МГЛ” ХХК-ийн эзэмшилд хууль бусаар орсон 748 ам.метр талбайг чөлөөлөх тухай 3 шатны шүүхийн шийдвэр гарсан бөгөөд тус компанийн барилга барих зөвшөөрлийг хүчингүй болгосон зэрэгт үндэслэн барилгын каркасыг албадан нурааж, газрыг чөлөөлж байгаа юм” гэх тайлбар өгсөн юм. Мөн НЗДТГ-ын дарга Д.Амгалан болон холбогдох албаныхан амралтын өдрөөр тус байршил дээр нь ажиллаж, буулгах ажлыг эхлүүлсэн байна. “Оргил МГЛ” ХХК-ийн эзэмшилд хууль бусаар орсон 748 ам.метр талбайг чөлөөлөх тухай гурван шатны шүүхийн шийдвэр гарсан бөгөөд тус компанийн барилга барих зөвшөөрлийг хүчингүй болгосон зэрэгт үндэслэн барилгын каркасыг албадан нурааж, газрыг чөлөөлж байгаа юм. 2017 онд иргэн Б.Дэлгэрмөрөнгөөс 322 ам.метр газрыг “Оргил МГЛ” ХХК-д газар эзэмших эрх шилжүүлж шийдвэрлэсэн, мөн газрын талбайн хэмжээг нэмэгдүүлсэн зэрэг асуудлыг мөн хууль хяналтын байгууллагаар шалгуулж байна.