77 дахь удаагийн “Met Gala” арга хэмжээ тавдугаар сарын 5-нд Нью-Йорк хотын Метрополитан урлагийн музейд болж өнгөрлөө. Энэ жилийн сэдэв нь “Superfine: Tailoring Black Style” буюу хар арьстнуудын дэнди хэв маягийг онцолсон бөгөөд орчин үеийн загвар дахь тэдний үүрэг, нөлөөг таниулахыг зорьжээ. Арга хэмжээг  Anna Wintour, Colman Domingo, Lewis Hamilton, Pharrell Williams, A$AP Rocky нар хамтран зохион байгуулсан бол Lebron James хүндэт даргаар нэрлэгдсэн ч бэртлийн улмаас оролцож чадаагүй байна. “Met Gala” арга хэмжээнд хүрэлцэн ирсэн онцлох зочид, хувцаслалтын талаар хүргэж байна.

Rihanna

Холливуудын алдарт дуучин Rihanna улаан хивсний ёслолд гурав дахь жирэмслэлтээ зарлаж, Marc Jacobs-ын загварын хар саарал өнгийн корсетен даашинз, улаан цоохор зангиа, том хар федора малгайгаар гоёжээ.

Diana Ross

“Met Gala” арга хэмжээнд домогт дуучин Diana Ross 22 жилийн дараа дахин оролцож, гайхамшигтай хувцаслалттайгаар олны анхаарлыг татлаа. Тэрбээр хүү Evan Ross болон дизайнер Ugo Mozie нарын хамтран бүтээсэн цагаан өдөн даашинзаар гоёсон бөгөөд энэхүү даашинз нь мөнгөн шигтгээ, сувд, болор чимэглэлтэй байв. Даашинзны 18 фут (ойролцоогоор 5.5 метр) урт шлейф нь түүний таван хүүхэд болон найман ач, зээ нарын нэрсийг мөнгөн шигтгээгээр хатгасан байлаа. Даашинзны шлейфийг зургаан туслах хүн барьж, улаан хивсний ёслолд оролцсон нь түүний хувцаслалтын сүр жавхланг улам нэмэгдүүлжээ.

Kamala Harris

 АНУ-ын дэд Ерөнхийлөгч асан анх удаа “Met Gala”-д оролцжээ. “Off-White” брэндийн захирал IB Камарагийн урласан хар, цагаан өнгийн тансаг даашинзаар гоёсон нь олны анхаарлыг татлаа. Энэхүү даашинз нь “Superfine: Tailoring Black Style” сэдэвтэй уялдсан бөгөөд хар арьстнуудын дэнди хэв маягийг онцолсон юм.

Zendaya, Sydney Sweeney, Dua Lipa

Эдгээр гурван алдартны хувцаслалт нь 2025 оны “Met Gala”-гийн сэдэвтэй нийцсэн, түүхэн болон соёлын утга агуулгатай, мөн хувь хүний онцлогийг тусгасан байв. Тэдний сонголт нь загварын ертөнцөд шинэ чиг хандлагыг тодорхойлохуйц байсан гэж олон нийт үзэж байна.

Doechii

“Met Gala” арга хэмжээнд дуучин Doechii анх удаа оролцож, Louis Vuitton брэндийн захирал Pharrell Williams-ийн урласан өвөрмөц хослолоор гоёж, “Superfine: Tailoring Black Style” сэдвийг онцгойлон илэрхийлсэн байна.

Kim Kardashian

 Энэхүү арга хэмжээнд Kim Kardashian дахин нэгэн өвөрмөц, анхаарал татсан төрхөөр оролцжээ. “Superfine: Tailoring Black Style” сэдвийг өөрийн хэв маягаар илэрхийлсэн юм. Тэрбээр Chrome Hearts брэндийн хар өнгийн, матрын арьсан хээтэй хоёр хэсэгтэй хослол өмссөн нь түүний биеийн галбирыг онцлон харуулж, дэнди хэв маягийн орчин үеийн хувилбарыг бүтээжээ.

“Met Gala” нь жил бүрийн тавдугаар сарын эхний даваа гарагт зохион байгуулагддаг бөгөөд 1948 оноос хойш үргэлжилж буй загварын хамгийн нэр хүндтэй арга хэмжээ юм. Энэ жилийн арга хэмжээ хар арьстнуудын загвар дахь үүрэг, нөлөөг онцолсноороо онцлог байв. Улаан хивсний ёслолын бүх зургийг Vogue-ын албан ёсны хуудаснаас үзэх боломжтой.