Хан-Уул дүүргийн 18 дугаар хороонд байрлах “Гэгээнтэн” төвийн хана нурж, зогсоол дахь машинууд дээр унаж, шил, толийг нь хагалжээ. Харин машинуудын ойролцоо хүн байгаагүй учир бэртэж, гэмтсэн хүн байхгүй байна. Зогсоол дээр байсан .... дугаартай автомашины жолоочтой холбогдоход "Миний машины хажууд дахь машины дээрээс хавтан уначихсан шил, толыг нь хагалчихсан байсан. Нэлээн том хавтан унасан байсан учир шил, толийг нь хагалаад зогсохгүй машиныг нь хонхойлгосон байх. Намайг машинаа авахад тэр машины эзэн ирээгүй машин дээр нь хавтан дараатай байсан" гэв. 

    Хаврын хавсарганд хана нь нурж унасасан “Гэгээнтэн” төвийн барилгыг 2015 онд “Жигүүр гранд” ХХК-ийнхан барьж, ашиглалтад оруулжээ. Тодруулбал,  Ихэнх компани томоохон бүтээн байгуулалт хийхдээ гадна, дотнын компаниудаар архитектур, загвар дизайнаа гаргуулах, барилгын чиглэлийн хэд хэдэн туслан гүйцэтгэгч компанитай хамтран ажилладаг бол “Жигүүр гранд” групп барилгын зураг төсөл, загвар дизайнаасаа авахуулаад, барилгын ажил, дулаан, бохирын шугам сүлжээ хүртэл бүгдийг зуун хувь өөрсдөө хийдэг байна. Тус цогцолборын барилгын ажил 2012 оноос эхэлж 2014 оны сүүлээр бүрэн баригдаж дуусчээ.

"ГЭГЭЭНТЭН" ЦОГЦОЛБОРЫГ Д.БАТТӨР ЭХНЭР, ХҮҮХДҮҮДИЙНХЭЭ ХАМТ ЭЗЭМШДЭГ

    “Гэгээнтэн” цогцолбор нь орон сууцны хороолол, Энтертаймент төв, Гэгээнтэн кино театр, Хүүхдийн цагийн цэцэрлэг, Гэгээ караоке, автомат тоглоомын төв, зоогийн газрууд, дэгүүрүүд, оффисын газруудаас бүрддэг олон үйлчлүүлэгчтэй газар юм. Тус цогцолборын өмчлөгчөөр Д.Баттөр эхнэр, хүүхдүүдийнхээ хамт эзэмшдэг. Гүйцэтгэх захирлаар нь түүний охин Б.Халиунаа ажилладаг байна. Бүх үйлчилгээний төв, оффис, орон сууц нь цогцоор сүндэрлэх “Гэгээнтэн” хотхон нь үндсэн дөрвөн цогц байртай. Тухайлбал, оффисын хоёр байр, Энтэртаймент төв болон дөрвөн орц бүхий орон сууцны нэг байраас бүрдэнэ. Оффисын хоёр байрныхаа дунд голлон байрлах энтэртаймент төв нь таван давхар бол оффисын байрнууд нь 16 давхар өндөр юм. Харин орон сууц нь зүүн талдаа буюу олны нүднээс далд оффис, энтэртаймент төвийнхөө цаана байхаар шийдэж өгчээ.

   “Гэгээнтэн” цогцолборын барилгууд нь төмөр бетон, карказан барилга. Нийт талбай нь 11800 ам дөрвөлжин метр талбайтай аж. Үүнээс 5870 ам дөрвөлжин метр талбайд худалдаа үйлчилгээний зориулалттай төв байдаг. Энтэртаймент төв болон оффисын төв нь нүүрэн талдаа нарны хэт ягаан туяанаас хамгаалсан гурван давхар шилэн фасадтай. Германаас орж ирсэн нөөцийн цахилгаан үүсгүүр, орчин үеийн агааржуулалтын системтэй. Энэхүү цогцолбор хотхоныг олон улсын стандартын дагуу чанарын өндөр түвшинд барьж байгуулсан хэмээн мэргэжилтнүүд үздэг юм билээ. “Жигүүр гранд” групп “Гэгээнтэн” цогцолбор хотхоныг барьснаар зөвхөн энтэртаймент төвдөө л гэхэд 100 гаруй ажлын байр шинээр бий болгожээ.