Онцгой байдлын ерөнхий газрын мэдээллийн үеэр сэтгүүлчид холбогдох албаныхнаас асуулт асууж, хариулт авлаа.

Сэтгүүлч "Өчигдөр Хойд бүсийн зөвлөгөөн Булган аймагт болсон. Энэхүү зөвлөгөөнд Засгийн газрын гишүүд, дарга нар Онцгой байдлын байгууллагын нисдэг тэргээр явсан гэх мэдээлэл байна. Харин Богд хан ууланд 17:00 цаг орчмын үед дуудлага ирсэн гэх мэдээллийг Онцгой байдлын байгууллагаас өгсөн. Гэтэл 20:00 цагийн үед гал гарч байгаа газар очсон гэх юм. Хэрэв нисдэг тэрэг байсан бол тухайн газар дээр цаг алдалгүй очих байсан. Гэнэтийн гамшиг осол гарвал яах вэ. Дарга нар нисдэг тэргийг чинь унаад явчихдаг юм уу" гэв.

      УОК-ын нарийн бичгийн дарга, хурандаа Т.Баярхүү "Онцгой байдлын байгууллагын үйл ажиллагаанд ашиглагдаж байгаа нисдэг тэрэг бол эрэн хайх, аврах, түргэний нислэг гээд Онцгой байдлын байгууллагын үйл ажиллагаанд бүх л талаар дэмжлэг үзүүлэх зорилгоор ажилладаг. Яг одоо нэг нисдэг тэрэг Сэлэнгэ аймагт гарсан түймэр унтраах ажиллагаанд ажиллаж байна. Өчигдөр 17:00 цагийн орчимд нийслэлд түймэр гарах хэмжээний салхи шуургатай байсан. Нэгдүгээрт, нисэхийн аюулгүй байдлын асуудал яригдана. Нисдэг тэргийг ашиглаад шууд түймэр унтраах ажиллагаанд оролцоход агаарын нөхцөл байдал шалтгаалж байгаа. Энэ бол биднээс үл шалтгаалах нислэлийн аюулгүй байдал, дүрэмтэй холбоотой асуудал учир бид холбогдох мэргэжлийн байгууллагынхаа зөвлөмж, сэрэмжлүүлгийн дагуу ажилладаг. Нисдэг тэрэг бол олон үйл ажиллагаанд дэмжлэг туслалцаа үзүүлээд, шаардлагатай тогтмол үүрэг гүйцэтгээд ажиллаж байна" гэх хариултыг өглөө.