МАШИНЫ ЧЕНЖ Х.БУЛГАН: САРД 2-3 ХЯТАД МАШИН ЗАРАГДДАГ 

     Сүүлийн үед ганган чамин хятад машин нийслэлийн замын хөдөлгөөнд оролцох болжээ. Үүнтэй холбогдуулан бид хятад машины талаар “Да хүрээ зах”-ын ченж Х.Булгантай холбогдож, хятад машины талаар тодруулсан юм. Тэрбээр “Сүүлийн үед хятад машин сонирхож байгаа хүн их боловч худалдан авч байгаа нь цөөн. Сард 2-3 машин зарагддаг. Хятад машин 60-80 саяын хооронд худалдаалж байна. Загвар, үзэмж сайн ч хотын замд хурдан иллэгддэг гэж хүмүүс ярьдаг.  Хятад машины сэлбэг бараг олддоггүй. Энэ бас нэгэн сул тал болчихоод байгаа” гэлээ. 

ХЯТАД МАШИН 60-130 САЯ ТӨГРӨГИЙН ҮНЭТЭЙ БАЙНА

     Монголын автомашины зах зээлд Хятадын брэндүүдийн нөлөө өдөр ирэх тусам хүчээ авч байна. Хэдхэн жилийн өмнө зөвхөн хэрэглэгчдийн дунд маргаан дагуулдаг байсан “Хятад машин” гэх ойлголт өнөөдөр шинэ технологи, цахилгаан шийдэлтэй уралдан, зах зээлд байр сууриа өргөжүүлжээ. BYD, Changan, Geely, Jetour зэрэг брэндүүд Монголд албан ёсны шугамаар орж ирж, 60-130 сая төгрөгийн үнэтэй худалдаалж байна. Зах зээлийн ханшаар авч үзвэл, япон, европ машины ижил түвшний загваруудаас 20-30 хувиар хямд үнэтэй байгаа нь хэрэглэгчдийн анхаарлыг эрхгүй татаж байгаа билээ. Тухайлбал, BYD Song Plus DM-i загвар 110 км бүрэн цахилгаан явалттай, 1.5 литрийн турбо мотортой, 100 орчим сая төгрөгийн үнэтэй зарагдаж байна. Энэ нь шатахуун өндөр үнэтэй, цахилгаанжуулалт эрчимжиж буй өнөө цагт тун оновчтой шийдэл мэт харагдана. Цахилгаан, хосолмол хөдөлгүүр, ухаалаг жолоодлогын систем, хамгийн сүүлийн үеийн аюулгүйн стандартуудыг хангаж буй хятад автомашинууд өнөөдөр Япон, Солонгосын брэндүүдийн технологид нэлээд ойртжээ. Зарим талаараа бүр илүүрхэж ч байгаа. Ялангуяа BYD компанийн хувьд дэлхийд Tesla-ийн дараа ордог цахилгаан автомашины борлуулалтаар тэргүүлж байгаа нь Монголд орж ирж буй загваруудын чанарт итгэх үндэс болж өгч байна.

ХЯТАД МАШИН АВСАН ХЭРЭГЛЭГЧИД АВСАН ҮНИЙНХЭЭ 30-50 ХУВИЙГ АЛДДАГ

    Хятад автомашины сул талын тухайд ярихгүй өнгөрч болохгүй. Түүхэн талаас нь авч үзвэл, бат бөх байдал, эдэлгээний чанар дээр зарим эргэлзээ өнөөдөр ч оршсоор байна. Ялангуяа Монголын эрс тэс уур амьсгалыг эдгээр автомашинууд хэр “даадаг” вэ гэдэгт туршлага хомс хэвээр. Мөн дахин худалдах үед үнэ хурдан унадаг. Хятад машин авсан хэрэглэгчид 2-3 жилийн дараа дахин борлуулахдаа анх авсан үнийнхээ 30-50 хувийг алддаг жишээ цөөнгүй. Энэ нь зах зээл дээр “үнэ цэнгүйдэх эрсдэл” дагуулж буй.

ХҮЙТЭН ӨВӨЛД ЦАХИЛГААН МАШИН ТОХИРОХ УУ

     Нэмэлтээр, бүрэн цахилгаан болон хосолмол хөдөлгүүртэй загварууд хүйтэн өвлийн нөхцөлд хэр үр ашигтай вэ гэдэгт тодорхой дүгнэлт өгөхөд эрт байна. Одоогоор олон улсын туршлагаас үзэхэд, цэнэг барих чадвар нь -20 хэмээс доош унаж эхэлдэг. Иймд Монголд ашиглах нөхцөлд халаалт, батарейн хамгаалалтын систем сайтар судлагдах шаардлагатай. Гэсэн ч дэлхийн автомашины зах зээлийн чиг хандлага цахилгаанжуулалт руу эргэлт буцалтгүй шилжиж байгаа өнөө үед Хятадын автомашинууд Монголд өөрийн байр сууриа улам бэхжүүлэх нь тодорхой. Хямд үнэ, орчин үеийн шийдэл, ухаалаг технологитой хятад машинууд зах зээлийн дунд болон дээд ангилалд ч ширүүн өрсөлдөх төлөвтэй байна. Иймд хэрэглэгч бүр сонголтоо хийхдээ үнийг нь биш, чанар, үйлчилгээ, эдэлгээний зардал зэргийг цогцоор нь үнэлж байж шийдэх шаардлагатайг энэ салбарын мэргэжилтнүүд анхааруулж байна.