Сүүлийн жилүүдэд дэлхийн загвар, гоо сайхны ертөнцөд  нэгэн Монгол хүний нэр түгэх болсон. Тэдний нэг нь бол Лос Анжелест амьдарч, ажилладаг хумсны артист Г.Золжаргал буюу Зола. Түүнийг “Hailey Bieber-ийн хумсыг чимдэг Монгол бүсгүй” гэж нэрлэдэг ч, тэр үүнээс хавьгүй ихийг бүтээсэн нэгэн юм. Золжаргал хумсны урлагаар 2016 оноос хойш тууштай ажиллаж, АНУ-д салбараа нээсэн даруйдаа мэргэжлийн түвшний үйлчилгээгээрээ ялгарч эхэлсэн. Уламжлалт хэв маягийг орчин үеийн минимал загвартай хослуулсан өвөрмөц будалтууд нь түүнийг бусдаас онцгойруулж, оддын анхаарлыг татжээ. Түүний нэр хамгийн анх Hailey Bieber-ийн “glazed donut nails” хэмээх хумсны будалтаар дэлхийд түгсэн.

Цайвар ягаан туяатай, тунгалаг мэт хумсны энэ будалт одоо ч олон бүсгүйчүүдийн дунд тренд болсоор байгаа. Энэхүү загварыг анх санаачлагч нь Золжаргал байсан бөгөөд тэр үеэс хойш түүний нэр Instagram, TikTok, Pinterest зэрэг платформуудаар хүчтэй цацагдаж, загварын ертөнцөд танигдаж эхэлжээ. Золжаргал зөвхөн нэр хүндтэй үйлчлүүлэгчидтэй ажилладаггүй. Тэрбээр дэлхийн гоо сайхны салбарын хамгийн том брэндүүдийн нэг болох OPI-гийн албан ёсны элч төлөөлөгчөөр ажиллаж байна.

Энэ нь зөвхөн түүний ур чадвар бус, мэргэжлийн хандлага, салбартаа үзүүлж буй нөлөө нь олон улсад хүлээн зөвшөөрөгдсөний илэрхийлэл юм. “Би аливааг зөвхөн гоё харагдуулахыг биш, хүний зан төрх, мэдрэмжийг хумсаар нь илэрхийлэхийг хүсдэг” хэмээн тэрээр ярилцлагадаа дурдсан байдаг. Үнэхээр ч Золжаргалын хийсэн хумс бүхэн хувь хүний хэв маяг, гоо зүйн мэдрэмжийг илэрхийлдэг. Тэрбээр Hailey Bieber-ээс гадна Sydney Sweeney, Sabrina Carpenter, Vanessa Hudgens зэрэг Холливүүдийн одуудтай хамтарч, Vogue, Allure зэрэг сэтгүүлүүдийн нүүрийг чимсэн бүтээлүүд дээр ажилласан туршлагатай. Түүний Instagram хуудсаар зочлоход (@nailsbyzola) дэлхийн дээд зэрэглэлийн хумсны урлаг ямар түвшинд хүрснийг мэдрэх боломжтой.