Аврах 10 дугаар ангийн тасгийн дарга Д.Жанчив агсны эхнэр Б.Ганцэцэг мэдээлэл өглөө. Тэрбээр “Бид 22 жил хамт амьдарсан. Ханиа алдсанаас хойш бүтэн жилийн турш олон саад бэрхшээлийг туулж, дарга нарын хаалгыг сахиж, арга мухардсандаа өнөөдөр мэдээлэл хийж байна. Талийгаач минь Онцгой байдлын албанд 25 жил ажилласан. Тэр хугацаанд өргөсөн тангарагтаа үнэнч байж үүрэгт ажлаа биелүүлсэн. Монголын төр 25 жил ажилласан алба хаагчаа үнэлж чадахгүй байгаад нь харамсаж байна. Миний хань 25 жил ажиллахдаа нэгийн нэг гэдэг албанд ажилласан.  Ажлаа хийж байхдаа  7000 гаруй хүний амь аварсан баатарлаг нэгэн. Би ханиа алдсанаас хойш хоёр удаа хагалгаанд орсон. Үүнийхээ хажуугаар бусад улсын онцгой байдлын алба хаагчдын хувцас, хэрэглэлийг судаллаа. Ард түмнийг аврагч авардаг бол аврагчийг хувцас, хэрэгсэл нь авардаг байх ёстой. Онцгой байдлын албанд стандартын хувцсыг хангалттай өгөөчээ. Гал сөнөөгчид  хувцсандаа л найдаж улаан гал руу орж байгаа шүү дээ. 25 жилийн туршлагатай миний хань амиа алдсан  нь ОБЕГ-ын хувцас, хэрэглэлийн чанартай холбоотой.  Алба хаагчдынхаа шагналыг дарга нар нь авдаг хэрнээ хариуцлагыг нь хүлээдэг бил үү. Миний ханийн ажилласан жил, хөдөлмөрийг нь үнэлдэггүй юм аа гэхэд таван хүүхдийнх нь өмнө төр хариуцлага хүлээхгүй шударга бус хандаад байгаа юм бэ. Бид энэ хугацаанд Монгол Улсын Ерөнхийлөг У.Хүрэлсүх, Чингэлтэй дүүргийн ИТХ-ын дарга болон Засаг даргад хандсан. Бид Ерөнхийлөгчийг зөв шийдвэр гаргатал нь гэр бүлээрээ суулт хийнэ" гэв.