Монголбанк нь 2010 оноос үндэсний брэнд төгрөгийн картыг бий болгох санаачилгыг гаргаж, банкнуудтай хамтран 2012 онд төгрөгийн картыг амжилттай нэвтрүүлсэн билээ. Монголбанк Мастеркарт байгууллагатай M/Чип технологийн лицензийн гэрээг 2019 онд байгуулснаас хойш хоёр жилийн хугацаанд хамтран ажилласнаар үндэсний брэнд төгрөгийн картыг нууцлал, аюулгүй байдлыг өндөр түвшинд хангасан EMV чип болон NFC зайнаас унших технологид шилжүүлсэн. Ингэснээр, чиптэй төгрөгийн картад суурилсан QR кодоор гүйлгээ хийх, төгрөгийн картын мэдээллийг токенжуулах (tokenization) зэрэг олон үйлчилгээний суурь тавигдсан юм. Мөн карт эзэмшигч төгрөгийн картаараа нийтийн тээвэр, автомашины зогсоол, замын төлбөр гэх мэт үнийн дүн багатай гүйлгээг пин код ашиглахгүйгээр картаа зайнаас уншуулж төлбөр тооцоо хийж байна. Эдгээр алхмыг үе шаттайгаар хэрэгжүүлснээр үндэсний брэнд ₮ картыг олон улсад нэртэй Apple Pay үйлчилгээнд холбон ухаалаг гар утсанд суурилсан төлбөр тооцоо хийх  боломжийг 2024 онд бүрдүүлсэн юм. 

Үндэсний брэнд төгрөгийн картын хэрэглээг өргөжүүлэх, хилийн чанадад, бусад улсын төлбөрийн картын сүлжээнд ашиглагдах гарцыг бий болгох зорилгын хүрээнд Монголбанк болон Хонконгийн EFT Solutions компани 2024 оны зургадугаар сарын 21-ний өдөр Хамтран ажиллах санамж бичгийг зурж баталгаажуулан, хамтын ажиллагаагаа эхлүүлсэн билээ. Ингэснээр 2025 оны гуравдугаар сарын 27-ны өдрөөс эхлэн Хонгконгд Үндэсний брэнд төгрөгийн картыг төлбөр тооцоонд ашиглах боломж нээгдлээ. Одоогоор ₮ картын лого байршсан худалдаа, үйлчилгээний цэгт ашиглах боломжтой байгаа бол цаашид түргэн үйлчилгээний дэлгүүр, метро, такси зэрэгт ₮ картыг ашиглах боломжтой болно. Энэхүү ажиллагаанд Монголын финтек салбарын төлөөлөл “Бонум” ХХК чухал үүрэг гүйцэтгэсэн юм. “Бонум” ХХК нь Мастеркартын үндсэн гишүүн, үйлчилгээ үзүүлэгч хамтрагч болсон Төв Азийн анхны финтек компани юм. 

Өнгөрсөн онд  төгрөгийн картыг Apple Pay сүлжээнд холбосноор карт эзэмшигчид ухаалаг гар утас ашиглан олон улсад төгрөгийн картын гүйлгээ хийж, төлбөр төлж эхэлсэн бол өнөөдөр төгрөгийн картыг Хонконгийн картын сүлжээнд шууд ашиглах боломж нээгдэж Монгол Улсын төлбөрийн хэрэгслийг олон улсын зах зээлд ашиглах бололцоо дахин нэмэгдлээ.