Бусдын эд эрхтэнг зөвшөөрөлгүй авсан хэрэгт холбогдсон П.Батчулуун эмчийн талаар талийгаачийн ар гэрийнхэн мэдээлэл хийлээ. Талийгаачийн ээж Б.Алтантуяа “Охиныг минь донор болгоё гэхэд ах, дүү нар нь дургүй байсан. Эмч нарыг гуйсны эцэст элэг, бөөр хоёрыг нь өгье. Түмэнд буян болъё гээд зөвшөөрсөн. Гэтэл охины минь элэг, бөөрийг авахаас гадна хөлийн судас, шөрмөс, тойг, чөмгийг нь  давхар авчихсан байсан. Бид олон эрхтэнг нь авах байсан охиноо донор болгохгүй байсан.  Тухайн үед эмч нар бидэнд “Уучлаарай, нэг юм хүсье. Элэг, бөөр дээр нэмээд ганц хоёр судас авч магадгүй шүү” гэсэн. Би П.Батчулуун эмчийг насаараа ард түмнийхээ төлөө ажиллаж байсныг ойлгож байна. Энэ хүнийг шоронд хийлгэх гэж яваагүй шүү дээ. Яагаад илүү эрхтэнийг нь авсан юм бэ. Яаж шийдэхийг хууль шүүх л мэднэ, би мэдэхгүй. Энэ асуудлыг битгий дахин сөхөөч гэж хүсмээр байна” гэлээ.