Өнгөрсөн шөнө цагдаагийн байгууллагаас Ноорог.мн сайтын албан өрөөнд хойшлуулшгүй ажиллагаа явуулж, долоон ажилтныг нь саатуулж, ажлын хэрэгсэл, хард, ажилтнуудынх нь утас гэх мэт зүйлсийг хурааж, өглөөний 05:00 цаг хүртэл мэдүүлэг авсан талаар мэдээлсэн.Тэгвэл тус сайтын захирал О.Уламсайхан мэдээлэл өгч байна.

         Тэрбээр “Хойшлуулшгүй ажиллагаа гэдэг үгтэй шинээр танилцлаа. Хойшлуулшгүй ажиллаагаа гэдэг нь тухайн сэжигтэн нотлох баримтаа нуун дарагдуулах гэж байгаа эсвэл гадаад руу оргон зайлах гэж байгаа үед ашиглагддаг үг хэллэг. Бидний хувьд цэргийн баярын өмнөх өдрийг видео тоглоом тоглож өнгөрүүлж байсан. Гэтэл шөнө 21:00 цагт байршлыг нь мэдэх боломжгүй газар, нөхцөлд байхад ирж, утас, холбоо барих хэрэгслийг хурааж авсан. Тухайн үед манайхаас өмгөөлөгчтэйгөө холбогдох хүсэлт тавихад “Цагдаагийн газар очоод холбоо барь” гэсэн. Бидэнд ямар нэгэн үндэслэл танилцуулаагүй “Та нарын хийдэг ажилтай холбоо” гэж хэлсэн. Өглөө 06:30 цагт манай сүүлийн гурван хүн байцаалт өгсөн. “18 хоног” киноны эвлүүлэг дуусаагүй. Тус кинонд хууль бус үйл явдлыг бичиж авсан дэлгэрэнгүй дүрс байхгүй. Гэхдээ агуулга нь сонгууль ямар хэмжээнд шударга бус явагддагийг харуулна. Киноны нийт 14  террабайт дүрс одоо цагдаагийн байгууллагат байгаа. Гомдол гаргагч нь Кибер гэмт хэрэгтэй тэмцэх тасаг рүү чатаар “Ноорог сайтын хийдэг дүрс бичлэгээс болоод хүн амиа хорлох гээд байна” гэж бичиж гомдол гаргасан. Үүнийг ахлах мөрдөн байцаагч нь танилцуулсан. Гэхдээ гомдол гаргагчийн цахим хаягийн нэр нь зохиомол байсан. Өөрөөр хэлбэл, цахим сүлжээний зохиомол нэртэй хүний чатаар гаргасан гомдлын төлөө шөнө байршлыг нь мэдэхгүй хүмүүсийг хойшлуулшгүй ажиллагаагаар баривчилсан.

       Монголд байгаа бүх медиа агентлаг  MCS, АПУ-ийн дүрсийг авч хамтарч ажиллаж байсан байх. Ингэж л маркетинг хийдэг. Бид өөрсдийгөө худал мэдээлэл түгээж, хэн нэгний нэр хүндэт санаатайгаар халдсан гэж бодохгүй байна.  "Ноорог" бол шинэ, залуу баг. Бусад хэвлэл мэдээллийн хэрэгсэлтэй адилхан сонгууль маш чухал үйл явдал байсан. Бид сурталчилгааны хугацаанд аль нэг нэр дэвшигч эсвэл намыг биш, энгийн зургаан хүнийг дагаж ажилласан. Бид киногоороо тухайн тойрогт ухуулагч нар яаж ажиллаж байна, сонгогчдын боловсрол ямар байна гэдгийг бичсэн.

        Манай оффисоос хураасан эд зүйлсийн жагсаалтыг бидэнд өгөөгүй. Юу хураасныг сайн мэдэхгүй байна. Гар утас, хувийн эд зүйлсийг хурааж авсан. Тухайн үед зарим хүмүүсээс утасных нь кодыг асууж байгаад, хувийн мэдээллийг нь харсан. Мөн хоорондоо юм ярихыг хориглосон. Тролл багийн логикийг ойлгохгүй байгаа. Манайхаас илүү өндөр санхүүжилттэй, том төсөвтэй редакцууд энд байна. Тролл баг ажиллуулна гэдэг ямар том бүтэц шаардагдахыг сайн мэдэж байгаа байх. Манайх шиг цөөхөн хүнтэй газар ажиллуулах боломжгүй. Киногоо бүтээхдээ 80 орчим сая төгрөг гаргасан. Үүний 30 гаруй сая нь олон нийтийн хандиваас боссон. Ямар ч мэдээлэл гарч магадгүй, бидний хэзээ ч сэтгэж чадаагүй мэдээллийг гаргаж магадгүй. Мэдээллүүдэд шүүлтүүртэйгээр хандаарай ” гэлээ.