Япон Улсын ОУ-ын хамтын ажиллагааны байгууллага ЖАЙКА-гийн санаачилгаар “Mongolia Open Innovation and Co-Creation for SDG’s 2024 (MICS)” хөтөлбөр хоёр дахь удаагаа амжилттай зохион байгуулагдлаа.

     Тус хөтөлбөрийн хүрээнд Монгол, Япон хоёр улсын хувийн болон төрийн хэвшил, төрийн бус байгууллага зэрэг олон талт багууд Тогтвортой Хөгжлийн Зорилтуудын хүрээнд Монгол улсад тулгарч буй асуудлуудыг шийдвэрлэхэд өөрсдийн санал санаачилга, шийдлийг танилцуулан өрсөлдсөн юм.  Энэхүү хөтөлбөр нь оролцогч багуудаас шилдэг төслийг сонгон шалгаруулж, тухайн төслийг урт хугацаанд хэрэгжүүлэхэд дэмжлэг үзүүлэх зорилготой бөгөөд энэ жил шилдэг таван төсөл санхүүжүүлт аваад байна.

     ХХБ шилдэг таван төслийн нэг болох “HEV/EV хуучин батерейг дахин ашиглах технологийн хөгжүүлэлт” төслийг 10 сая төгрөгөөр ивээн тэтгэлээ.

Монгол улсад импортоор орж ирж буй хуучин машинуудын 90 гаруй хувь нь Япон Улсаас орж ирдэг бөгөөд тэдгээрийн 75 орчим хувь нь хайбрид автомашин аж. Түүнчлэн хэрэглэгчид батерейны системд ямар нэг асуудал, эвдрэл үүсэх үед тухайн батерейг ил задгай хаях, хэсэгчлэн солиулах зэргээр зориулалтын дагуу ашиглах, ангилах, устгалд оруулах дадалгүй байдаг тухай энэхүү төсөлд дурдсан байв. Иймд ХХБ нийгмийн хариуцлагынхаа хүрээнд импортоор орж ирж буй хайбрид автомашины ашиглалтын хугацаа дууссан болон эвдрэл, гэмтэлтэй батерей системийг дахин ашиглах, урт хугацаандаа батерейны түүхий эдийг дахин боловсруулах зорилготой тус төслийг дэмжин ажиллахаар шалгарууллаа.

ХХБ нь Тогтвортой хөгжлийн 17 зорилтыг дэмжин ажиллах, нийгэмд тулгарч буй асуудлуудыг шийдвэрлэхэд хувь нэмэр оруулах зорилгоор “Mongolia Open Innovation and Co-Creation for SDG’s 2024 (MICS)” хөтөлбөрийн ивээн тэтгэгч байгууллагаар 2 жил дарааллан хамтран ажиллаж байгаа юм.

ТОГТВОРТОЙ ХӨГЖИЛД ХАМТДАА

ХУДАЛДАА ХӨГЖЛИЙН БАНК