2025 онд сарны тооллын онцлогоос шалтгаалан шинийн нэгэн тасарч, шинийн хоёрны өдөр буюу гуравдугаар сарын 1-нд цагаан сарын баяр тохиож буй. Шинийн хоёрны сарны дор хүслээ шивнэх ёс эртнээс уламжилж ирсэн билээ. Астрологичдын үзэж байгаагаар шинэ сар нь эрч хүч, өсөлт, шинэ эхлэлийн бэлгэдэл бөгөөд энэ үеэр өөрийн зорилго, мөрөөдлийг тодорхой болгож, түүндээ тэмүүлэх нь илүү үр дүнтэй байдаг аж. Хэдийгээр шинжлэх ухааны үндэслэлгүй мэт санагдаж болох ч, хүслээ тодорхой хэлж, түүндээ итгэх нь хүний сэтгэл зүйд эергээр нөлөөлж, өөрийгөө зорилгодоо хөтлөх хүч болдог гэж сэтгэл судлаачид үздэг. 2025 оны Цагаан сарын баяр шинийн хоёрны өдөр эхэлж байгаатай холбоотойгоор энэ жилийн саранд хүслээ шивнэх нь онцгой ач холбогдолтойд тооцогдож байна. Тиймээс та шинийн хоёрны сарны гэрэл дор өөрийн хүслээ шивнэж, ирэх ондоо аз хийморь, амжилт бүтээлээр дүүрэн байгаарай.