Бага насны хүүхдийн  хөгжил, боловсрол, судалгааны чиглэлээр эрдэм шинжилгээний хурал өнөөдөр МУБИС-д боллоо. Энэхүү хуралд МУБИС-ийн Сургуулийн өмнөх боловсролын сургууль, АНУ-ын Нью Мехико их сургууль, Индонезийн их сургууль, Семаран их сургууль, Филиппиний Боловсролын их сургууль, ОХУ-ын Буриадын их сургуулийн багш нар оролцож, илтгэл тавилаа. Хурлын талаар албаны хүмүүс ийн байр сууриа илэрхийлсэн юм

МУБИС-ын Сэтгэл судлал ухааны доктор: Ж.Батдэлгэр

-Олон улсын эрдэм шинжилгээний энэ хурал сургуулийн өмнөх  боловсролын хөтөлбөрийг шинэчилж байгаа цаг үед болж байна. Бага насны хүүхдийн хэл яриа идэвхтэй хөгжих үед сургалтад тохирсон үлгэр, зохиолд суурилсан арга зүйг хэрхэн, яаж багш нар зааж сургах, хүүхдийн онцлогт тохирсон арга зүйг хэрэгжүүлэх тал дээр манай төгсөгчид болон багш нар туршлага солилцлоо. Бага насанд олж авсан мэдлэг, дадал, хүмүүжил, төлөвшил хүний насан туршийн суралцахуйн үндэс болдог. Тиймээс бага насны хүүхэдтэй ажилладаг, төлөвшүүлдэг багш мэргэжилтэнг хэрхэн, яаж бэлтгэх вэ гэдгийг анхаарч байна. Хүүхэдтэй хамтарч ажиллах, хайрлах, хөгжүүлэх чиглэлээр багшийн хөтөлбөрийг шинэчлэх шаардлагатай байна. Нөгөө талаас бага насны хүүхдийн хөгжил, хүмүүжил гэр бүлээс ихээхэн шалтгаалдаг. Иймд эцэг, эхчүүд хэрхэн яаж дэмжлэг, тусалцаа үзүүлэх сэдвийн хүрээнд бага насны хүүхдийн төлөвшил, сургалтын хөтөлбөрийн талаар Филиппиний их сургуулийн профессор багш нартай туршлага солилцлоо.

“One sky” ТББ-ын Орон хариуцсан захирал: Т.Мөнхтуул

-Манай байгууллага бага насны хүүхдийн хөгжлийн талаар эцэг, эхэд зориулсан  сургалт явуулдаг. Энэ жил 200 гаруй эцэг, эхэд өөрсдөө хүрч ажиллах, бэлтгэгдсэн багш, арга зүйч нараар дамжуулан 1000 гаруй эцэг, эхэд хүрч ажиллахаар төлөвлөсөн. Энэ ажлын хүрээнд Боловсролын ерөнхий газар, Баянзүрх дүүргийн боловсролын хэлтэс, Баянзүрх дүүргийн Засаг даргын тамгын газар, Баянзүрх дүүргийн Хүүхэд, Гэр бүлийн хөгжил хамгааллын хэлтэстэй хамтарч ажиллаж байна.