ХӨСҮТ-өөс улаанбурхан өвчний тохиолдлын талаар мэдээлэл хийлээ.

Нийгмийн эрүүл мэндийн бодлогын газрын дарга Л.Баттөр “Эхний тохиолдол хоёрдугаар сарын 12-нд ХӨСҮТ-д хандаад, лабораторийн шинжилгээгээр хоёрдугаар сарын 18-ны өдөр батлагдсан. Тус иргэн 38 настай Вьетнам Улсад аялсан гэсэн мэдээлэл өгсөн. Хоёр дахь батлагдсан тохиолдол нь мөн Вьетнам Улсад аялсан гэх таван настай хүүхэд байгаа. Шинж тэмдэг хоёрдугаар сарын 16-нд илэрч, 20-нд ХӨСҮТ-д ирж эмчлүүлж эхэлсэн. Шинжилгээ хариу эерэг гарсан. Хоёрдугаарын 18-ны нислэгээр Улаанбаатарт ирсэн. Ойрын хавьтлын тоо онгоцонд хамт зорчсон 230 хүн байна. Хавьтлын судалгаа хийж байгаа. Гурав дахь тохиолдол өчигдөр батлагдсан. Малайз, Тайланд, Вьетнам Улсаар аялсан өгүүлэмжтэй 11 настай хүүхэд. Хоёрдугаар сарын 8-ны "МИАТ"-ийн нислэгээр Улаанбаатарт ирсэн. Өчигдөр ХӨСҮТ-д хандаж өгсөн шинжилгээний хариу нь эерэг гарч батлагдсан. Гурван тохиолдол өөр хоорондоо холбоогүй, гурван тусдаа аяллаас ирсэн зорчигчид байгаа. Хоёр дахь тохиолдлын дүү нь Вьетнам Улсад байхдаа улаанбурханаар өвдөж, эмчлүүлсэн байсан. Гурван тохиолдол вакцин хийлгээгүй байсан. Зөөвөрлөгдсөн тохиолдол илэрч байгаа учраас олон улсын нислэгээр ирж байгаа зорчигчдыг хянаж байна.Тус өвчнийг вакцинаар бүрэн сэргийлэх боломжтой” гэв.