Хамгийн гэгээлэг, оюунлаг эрхмүүдийг танилцуулж, залуусыг дэмжиж, улс төрийн даацтай ярилцлагуудыг уншигчдадаа хүргэдэг “Interview” сэтгүүлийн 035 дахь дугаар уншигчдын гарт хүрсэн. “Ган үзэг-2024” наадмын шилдэг сэтгүүлээр шалгарсан “Interview” сэтгүүлийн энэ удаагийн дугаарт Соёлын гавьяат зүтгэлтэн, зохиолч, яруу найрагч Г.Аюурзана,  “Өнөөдөр” сонины бизнес, гадаад бодлого хариуцсан орлогч эрхлэгч Б.Баярмагнай, “Урлах эрдэм” дээд сургуулийн багш С.Ганзүг нарын ярилцлага багтжээ. Тэдний ярилцлагаас онцлох таван эшлэлийг хүргэж байна.

ГУН-ААЖАВЫН АЮУРЗАНА: ҮНДЭСТЭН УГСААТНЫ СОЁЛ, ОРШИН ТОГТНОХ ЭРХИЙГ ХУВЬ ХҮНИЙ ЭРХЭЭС ДООГУУР ҮЗЭЖ ИРСНЭЭ ДЭЛХИЙ НИЙТ ЗАЛРУУЛАХ ЦАГ ИРНЭ Л ГЭЖ ГОРЬДДОГ

 

   ...Хүмүүст жинхэнэ юм уншуулах мөрөөдлөө орчуулгаар гүйцэлдүүлж болно гэж бодож явсан үе бий л дээ. Тэр үедээ орчуулахыг хүсч байсан, би л орчуулбал арай дээр хувилбараар монголчуудад хүрчихмээр юм шиг санагддаг байсан номууд ч бий...

...“Зохиолч” гэдэг нь үйл явдал зохиодог гэсэн утгаар биш, зохиолынхоо бүтэц, хэв маягийг зохиомжилдог гэсэн утгаараа л илүү оновчтой нэр...

...Хэрэв би "элгийн" юм бичвэл хөөрхий тэр л даруухан, цэвэрхэн, нам гүм номын сан минь шившиглэгдэх юм шиг санагддаг...

...Шүлгийг роман шиг төлөвлөх, жүжиг шиг найруулах, өгүүллэг шиг огцом эргэлтээр хувиргах боломжгүй. Шүлэг анхнаасаа эцсийн хэлбэрээ олчихсон төрдөг...

...Зарим хүний дэргэд "Зохиолч" гэгдэхэд нүүр улайх тохиолдол гардаг ч энэ насандаа олж авсан хамгийн чухал үнэт зүйл минь энэ. Өөрөө өөртэйгөө л халз тулж суугаад, дотроо буй болгосон ертөнцөө үгээр дүрсэлнэ гэдэг өрөөл бусадтай хөөрөлдөхөөс хавьгүй их цаг хугацаа шаарддаг, болж бүтэж байгаа эсэх нь ч тодорхойгүй, өөрөөсөө өөр хэнд ч найдалтгүй, энэ утгаараа ихээхэн эрсдэлтэй ажил...

Б.БАЯРМАГНАЙ: МИКРОФОН БАРЬСАН, ӨӨРИЙГӨӨ СЭТГҮҮЛЧ ГЭЖ НЭРЛЭСЭН БОЛГОН БУСДЫН ӨРӨӨ РҮҮ ДАЙРЧ ОРДОГ ТИЙМ ХЭВЛЭЛИЙН ЭРХ ЧӨЛӨӨ ГЭЖ БАЙХГҮЙ

...Сонины нийгэмд үзүүлэх нөлөө өндөр. Энэ нөлөө байсаар л байна. Дэлхийд ч ийм байгаа. Сонин уншсан хүн мэдлэг олж авдаг...

...Манай ахмадууд бол "Сайн сэтгүүлч бүтээлээрээ мөнхөрдөг, сайн бүтээл гарчгаараа мөнхөрдөг” гэж хэлдэг байлаа...

...Би сэтгүүлчийн дипломтой. Өдөр тутмын сонинд 20 гаруй жил ажиллаж байна. Тэгсэн ч би өөрийгөө хэзээ ч сэтгүүлч гэж ярьдаггүй. Сэтгүүлч гэдэг бол мэргэжлээс гадна алдар хүнд...

...Гол зорилго маань хүүхэд багачуудыг хөөрхөн сонинтой, хүүхдүүд нь чөлөөтэй үзэл бодлоо илэрхийлдэг индэртэй болгох юм. Хүүхдүүд нэг нэгнээсээ суралцаг, мөрөөдлөө биелүүлэг, сонин дээр юм бичмээр, томчуудад үгээ хэлмээр байвал энэ индэр дээрээ өөрсдөө бичиг л дээ. Ирээдүйд үзэл бодлоо нээлттэй илэрхийлдэг, хөгжсөн иргэд болоход нь бидний санаачилсан энэ сонин хувь нэмрээ оруулах болно...

                ...Хүмүүс нухацтай, үнэн, хариуцлагатай, зарчимтай мэдээллийн хэрэгслүүдийг ялгаж салгаж сурч байна...

С.ГАНЗҮГ: МОНГОЛЧУУД ЦАГИЙН ХАТУУ ЖИМИЙГ ЖАРГАЛ БОЛГОЖ ТУУЛДАГ

...Газар бүр янз янз байдаг. Сайхан модод ургаж, ус мөрөн урсаж байгаа газар бүр л надад эрчим түгээдэг. Магадгүй энэ их туйлширсан хариулт санагдах болов уу. Гэхдээ монгол шиг надад байгаллаг сэрэхүйг өгөх газар үгүй...

...Бид буруу юм хийвэл тэрхүү үйлдлийнхээ хариуд үйлийн үрээ эдэлнэ гэж ярьцгаадаг. Хүнд хамгийн гол нь үйлдэл маш чухал гэдгийг би урлагаар дамжуулан илэрхийлэхийг зорьсоор ирсэн...

                ...Монгол хүн дотоод сэтгэлийнхээ гүнээс уулыг уулаар нь, голыг голоор нь харж чаддаг. Энэ сэтгэлгээ нь хэдэн мянганы тэртээгээс дотор нь суучихсан байдаг болохоор байгальтай бусад үндэстнээс илүүтэй ойр байж, ойлголцож чаддаг...

...бүтээл бүхэн минь л нүүдэлтэй холбоотой. Заавал нүүдлийн ахуйг дүрсэлж, онцлон гаргаснаараа бус хүн төрөлхтөн танин мэдэхээр тэмүүлсээр байгаа эртний соёл, зан заншлыг үзүүлэхийг зорих нь чухал. Гол нь контемпорари урлагийг мэддэг атлаа өөрсдийн түүх уламжлалыг мартчихсан байж болохгүй...

...Гадны оронд хүмүүсийн эд эрхтнийг гаргаад өлгөчихсөн контемпорари бүтээлүүд олон. Харин монгол хүн тэгж болох yy...