Цагаан сарын баяр удахгүй болох гэж байгаатай холбогдуулан үзэсгэлэн худалдаа, худалдааны төвийн үнийн мэдээллийг хүргэхээр “Их Наяд” худалдааны төв болон ” Дүнжингарав” худалдааны төвийг зорилоо.

      Нийслэлийн Засаг даргын санаачилгаар гурав дахь жилдээ сар шинийн баярыг угтан зохион байгуулж буй "Амар байна уу-2025" үзэсгэлэн худалдаа “Их наяд” худалдааны төвийн 5-6 давхар, “Соёолж молл” худалдааны төвийн хоёрдугаар давхарт зохион байгуулж байна. Тус үзэсгэлэн худалдаа энэ сарын 1-27 хүртэл өдөр бүр 9:00-20:00 хооронд үргэлжилнэ. Есөн дүүрэг, 21 аймгийн нийт 1000 гаруй ЖДҮҮ эрхлэгчид , 50 мянга гаруй нэр төрлийн бараа бүтээгдэхүүн борлуулагдаж байна. Тус үзэсгэлэнгийн давуу тал нь худалдаа эрхлэгчид түрээсийн төлбөр, урсгал зардал төлдөггүй тул хямд, чанартай, үйлдвэрийн үнээр зарагддаг.

       “Их наяд” худалдааны төвд аарцан ааруул килограмм нь 35000 төгрөг, сүүн ааруул килограмм нь 45000 төгрөг, хурууд килограмм нь 45000 төгрөг, 25 ширхэгтэй ааруулан тавгийн идээ 380000-480000 төгрөгийн үнэтэй чимэглэл ааруул дагалдана. Айраг, шар тос, өрөм, хайлмаг, жимсний өтгөрүүлсэн шүүснүүд гэх мэт бараанууд худалдаалагдаж байна.

      “Дүнжингарав” худалдааны төв энэ сарын 1-ээс цагаан сарын өргөтгөсөн худалдаа эхэлсэн. 10:00-20:00 хооронд үргэлжилнэ. “Дүнжингарав” худалдааны төвд аарцан ааруул килограмм нь 35000 төгрөг, сүүн ааруул килограмм нь 45000-50000 төгрөг, хурууд килограмм нь 45000 төгрөг, 25 ширхэгтэй ааруулан тавгийн идээ 400000-480000 төгрөгийн үнэтэй мөн чимэглэл дагалдана.

Худалдааны төв болон үзэсгэлэн худалдаа үнийн хувьд хол зөрүүгүй байна. Өөрт ойр байрлах үзэсгэлэн худалдаанаас цагаан сарын хэрэгцээт бараа бүтээгдэхүүнээ нэг дороос бэлтгэхийг  зөвлөж байна.

Г.АЗЖАРГАЛ