Үе үеийн сэтгүүлчдийн  өнөр бүлийн өргөө гэр тоонот нь, эв эеийн илэрхийлэл төв нь болсон Монголын Сэтгүүлчдийн Нэгдсэн Эвлэлийн Ерөнхийлөгч, авьяаслаг  залуу сэтгүүлч Өлзийбаярын Отгонбаатар эр бие жагссан ид сайхан насандаа хорвоогийн  мөнх бусыг үзүүлж Монголын  сэтгүүл зүй, нийгмийн оюун санааны ертөнцөд  нөхөж баршгүй хүнд гарз тохиолоо. Ази тивдээ үлгэр жишээ ардчилалтай Монгол Улсад ардчилсан нийгмийн үнэт зүйлийг хамгаалан баталгаажуулах гол хүчин зүйл  чөлөөт ардчилсан хэвлэл мэдээллийг эх орондоо жинхэнэ утгаар нь бүрэн гүйцэд төлөвшүүлэхийн төлөөх үйл хэргийг эрхэмлэгч Монголын сэтгүүлчдийн мэргэжлийн байгууллагыг удирдан залах нэн хариуцлагатай албанд тэрээр сэтгүүлч нөхдийнхөө итгэлийг хүлээн  амжилт бүтээл дүүрэн  зүтгэж явсан юм.    

    Монголын үндэсний радиогийн хүүхдийн цовоо цойлгон дуу хоолой болж эх орны өглөө бүрийг эхлүүлдэг байсан балчирхан үеэсээ л  Ө.Отгонбаатар хэний хүү хэн болохоо эх орон, ард түмэндээ таниулсан бахархам хувь заяаны эзэн байж, хэвлэл мэдээлэл, сэтгүүлзүйн халуун гал тогоонд сэтгүүлч ах, эгч нарынхаа мөрөөр орж хорвоог таньж гар ганзага, хөл дөрөөнд хүрэн мэргэжлийн сэтгүүлч болсон билээ. Монголын сэтгүүл зүйн өндөр босгоор алхан орж ирсэн Ө.Отгонбаатарын тэр цаг үе бол Монголд шинэ цагийн чөлөөт хэвлэл мэдээллийн хэрэгслүүд бий болж, олон арван телевиз ар араасаа төрөн гарсан  нийгэм цаг үеийн халгиа цалгиатай 1990-ээд оны  эхний он жилүүд байлаа.  

     Өнөөдрийг хүртэлх хугацаанд тэрбээр “Ийгл”, ТВ-9, С1, ТВ10, ТВ5 зэрэг томоохон  телевизийн нүүр царай болж, сурвалжлагч, тоймч, мэдээний албаны дарга, гүйцэтгэх захирал, захирал, ерөнхий редактораар ажиллан  ачааны хүндийг үүрч, асуудлын голыг нугалдаг, хамаг л хариуцлагатай  албанд хүчин зүтгэж их өрсөлдөөн дунд дэлгэц эзэгнэнхэн дэвжиж хөгжсөн  уран бүтээлч байв. Тийм ч учраас   монголын сэтгүүлчид, түүний дотор ахмад үеийн үзэг нэгт сэтгүүлчид бид 2022 оны долдугаар сарын 06-нд хуралдсан МСНЭ-ийн ээлжит Их хурлаараа Ө.Отгонбаатарыг мэргэжлийн байгууллагынхаа удирдагчаар сонгон баталж,  Монголын чөлөөт хэвлэл мэдээллийн хүнд ачааг түүнд үүрүүлсэн билээ.  Тэр монголын сэтгүүлчдийн итгэлийг дааж манай мэргэжлийн холбоог чадмагаар удирдаж байлаа. Үйл ажиллагаа, үйлс зорилго, төр түмний өмнө хүлээсэн үүрэг хариуцлагаараа монголын төрийн бус олон байгууллага дундаас ямагт манлайд нь явж ирсэн, эрин цаг үеийн түүхийг үнэн мөнөөр нь бичиглэн туурвигч  мөнхийн бичээч, нийгмийн  оюун санааны түүчээ хүчийг эгнээндээ нэгтгэсэн МСНЭ-ийн Ерөнхийлөгч зуурдаар нас нөгчсөнд тус холбооны  ахмад сэтгүүлч бид сэтгэл эмтрэн гашуудаж, гэр бүл, үр хүүхэд, ахан дүүсэд нь гүн эмгэнэл илэрхийлж  байна. Ө.Отгонбаатарын минь төрөлх хөөрхөн ааш, хүүхэд  зан чанар , Монголын үндэсний радиогийн алтан фондод мөнхөрсөн өвөрмөц содон дуу хоолой, телевизийн цэнхэр дэлгэц эзэгнэсэн гэгээн дүр төрх бид бүхний төдийгүй монголын үзэгч , сонсогч түмний  зүрх сэтгэлд  үүрд хоногшин үлдэх болно. 

ХҮНДЭТГЭЛ ҮЗҮҮЛСЭН АХМАД СЭТГҮҮЛЧИД:

Хорлоогийн ЦЭВЛЭЭ-Монгол Улсын Хөдөлмөрийн баатар, Монгол Улсын Соёлын гавьяат зүтгэлтэн, профессор

Тугалхүүгийн БААСАНСҮРЭН-Монгол Улсын Соёлын гавьяат зүтгэлтэн, Доктор, профессор

Ломбын НОРОВСҮРЭН-Монгол Улсын Соёлын гавьяат зүтгэлтэн, доктор, профессор

Даваагийн ДОРЖДУЛАМ-Монгол Улсын Соёлын гавьяат зүтгэлтэн

Сүрэнгийн ЗЭВСЭГ-Монгол Улсын Соёлын гавьяат зүтгэлтэн

Адъяагийн БАЯРМАГНАЙ-Монгол Улсын Соёлын гавьяат зүтгэлтэн

Найдансүрэнгийн ДАРИЙМАА-Монгол Улсын Соёлын гавьяат зүтгэлтэн

Донойн ЦЭДЭН-ИШ-Монгол Улсын Соёлын гавьяат зүтгэлтэн

Ядамжавын СУМЪЯА-Цэндийн Намсрайн нэрэмжит шилдэг редакторын шагналтан

УМ МА НИ БАД МЭ ХУМ