Нийслэлийн Баянгол дүүргийн 22 дугаар хороонд өнгөрсөн нэгдүгээр сард гэр бүлийн зургаан хүн угаартсаны улмаас нас барсан харамсалтай хэрэг гарсан. Тэгвэл тус гэр бүлийн гишүүн болох цэргийн алба хааж байсан хүү нь өнөөдөр харамсалтай, гомдолтой байгаа талаараа сэтгүүлчдэд мэдээлэл өгсөн юм. Үүнтэй холбогдуулан Цагдаагийн ерөнхий газраас мэдээлэл хийлээ.

    Энэ үеэр тус газрын Хэвлэл мэдээлэл, олон нийттэй харилцах хэлтсийн дарга Г.Пүрэвдэлгэр "Өнөөдөр амь хохирогчдын гэр бүлийн хүн мэдээлэл өглөө. Тус иргэдийн нас барсан шалтгааныг тогтоохоор мөрдөн шалгах ажиллагаа үргэлжилж байна. Урьдчилсан байдлаар угаартсан гэх дүгнэлт гарсан. Тодорхой хугацааны дараа мэргэжлийн шинжээчид албан ёсны дүгнэлтийг тогтоох юм. Иймээс бид нарийн шинжилгээний дүгнэлт гарахаар эргэн мэдээллэх болно. Бид иргэн О бол хохирогчийнхоо үүднээс энэ хэргийн мөрдөн шалгах ажиллагааны оролцогч. Тиймээс бид шалгалтын ажиллагаа явагдаж буйг тайлбарлаж, оролцогчийн эрх, үүргийнхээ хүрээнд мэдээллүүдийг задлах нь шийдвэрлэх үйл ажиллагаанд саад болно гэдгийг сануулсан. Түүнээс хэвлэлд мэдээлэл өгч болохгүй, болно гэх асуудал огт хэлээгүй. Тийм хууль ч байхгүй" гэв.