Засгийн газрын хуралдаанаар хаврын уралдаантай холбоотой шийдвэрийг танилцууллаа. Энэ үеэр Гэр бүл, хөдөлмөр, нийгмийн хамгаалалын сайд Л.Энх-Амгалан “Үндэсний спорт, арга хэмжээг аймаг, орон нутаг нь зохион байгуулах эсэхээ шийддэг болсон зохицуулалт Засгийн газраас гаргасан. Засгийн газрын 57 дугаар тогтоолд өөрчлөлт орж байгаа учир үүнтэй уялдуулж, Гэр бүл, хөдөлмөр, нийгмийн хамгаалалын яамны өмнө нь гаргасан тушаалд зохицуулалт хийхээс өөр аргагүй болж байна. Хүүхдийн эрхийг хамгаалж байгаа төрийн бус байгууллагынхантай уулзсан. Хамгийн чухал нь хүүхдийн эрхийг хангах ёстой. Энэ тал дээр хэрхэн анхаарах талаар хүүхдийн эрхийг хамгаалж байгаа төрийн бус байгууллагынхантай болон Морин спорт уяачдын холбоотой хэд хэдэн удаа уулзсан. Нэг, хоёрдугаар сард хурдан морины уралдаан зохион байгуулж байгаа явдлыг хууль бус уралдаан гэж үзнэ. Хууль бус уралдаан зохион байгуулж байгаа хүмүүст эрүүгийн хариуцлага хүлээлгэх зохицуулалт хийж байгаа. Тухайн уралдааныг аймаг, орон нутаг өөрсдөө шийддэг болсон ч гэлээ хаврын уралдааныг гуравдугаар сарын 1-ээс хойш болдог болгоно гэдэг зөвлөмж олгоно. Гуравдугаар сараас хойш болж буй уралдаанд 12-с дээш насны хүүхдүүд морь унах ёстой. Хүүхдийн хувцас, хэрэгслийг сайжруулах стандарт гаргахаар ажиллана. Тавдугаар сараас арваннэгдүгээр сарын хооронд хурдан морь унаж байгаа хүүхдүүдийг тэвчишгүй хөдөлмөр эрхэлж байна гэж үздэггүй. Харин бусад үед хурдан морь унах юм бол тэвчишгүй хөдөлмөр мөн гэх асуудал үүсээд байгаа” гэв.