Г.Аюурзана нь яруу найргийн төрлөөр "Ганцаар цайвар навч”, “Цаг хугацаа амсхийх зуур”, “Философийн шүлгүүд”, “Non Plus Ultra”, “Сэтгэл рүү шагайгч Түүнд”, “Бясалгал”, “Арван зургаан давхрын аглагт” зэрэг ном хэвлүүлсэн билээ. “Шидийн барилдлага” хэмээх энэхүү яруу ном нь түүний 10 дахь түүвэр нь болж байна. Түүний шинэ номоос онцлох шүлгийн мөртүүдийг хүргэж байна.

***

Бодлоо нуусан харцыг чинь 

Үзэгдэх нь халаг нулимсыг чинь

Бороотой ой шиг инээмсэглэлийг чинь 

Сонсогдох нь халаг нам гүмийг чинь

Тэгтлээ амьд төсөөлсөн 

Тэр шид ахиж амилахгүй нь.

Тийм санаандгүй анхилсан 

Тэр амьсгал эргэж эвлэхгүй нь.

***

Яаж ийгээд одоо жар хүрч үзэх хэрэгтэй.

Ядаж жилд ганц шүлэг бичсээр дал хүрчих хэрэгтэй.

Арван долоон шүлгийн мөртэй үлдэв үү дээ

Амьдралын энгийн увидас энэ.

***

Нойр хулжихад бодно

Нойроо хулжтал бодно

Нойрон дундаа бодно

Зүүдэн дотроо зүднэ. 

***

Энэ бүхэн дурсамж болсны дараа л 

Эргэж тохиохгүй харц чинь ямар үнэтэйг ухаарах болно. 

***

Хуурамч, бүрмэл хольцтойг нь мэддэг ч 

Зүүсээр дасчихсан мөнгөн бөгж-амьд явах шалтаг. 

Худалдаж авсан шинэ хослол дахиад жаахан амьд байх шалтаг.

***

Энэ орчлонгоос зээлсэн биеэ 

Эргүүлж тушаах цаг ойртсоор л 

Ахиад төрж байж л учирч магадгүй нас минь 

Буцаад хүрэх аргагүй улам холдсоор л.

***

Чамайг гэх минь намайг гэхээс чинь хол илүү ч 

Цаанаас чинь нэвт гэрэлтэх энэрэлийг мэдэрнэм.

Гуньсан сэтгэл энэ л мэдрэмжийн ачаар 

Гурван бадагт хувирсныг үзэх-аврал мэт. 

***

Үнсээд

“Тайван нойрсоорой” гээд 

Үдэхийг чинь мэддэгтээ л 

Амгалан амьдардаг шүү 

Үлдэж чадах болов уу гэхээс

Өрөвдөж, улам хайрладаг шүү. 

***

Бусдыг ойлгох нь уучлахын л тулд юм бол 

Зарим нэгүүдийг ойлгохоос татгалздаг би.

Бурханы дүрийг хүн л зурсан юм бол 

Залбираад нэмэргүй гэж түдгэлздэг би.

***

Буян, нүгэл хоёрын ялгааг таних гэж л 

Гэрээс гарлаа. 

Буян мэт харагдагч нүглээс

Буруулах зам олдоогүй учраас газар суулаа.